«Чуораанчык» сурунаал 6-с №-э Нам улууһугар ананан таҕыста. Нүөмэр Нам улууһун үөрэҕириитин ситимигэр төрөөбүт тылы, култуураны иитии-үөрэтии, сахалыы эйгэни тэрийии биир кэлим үлэтин бырагырааматыгар олоҕуран оҥоһулунна. Сурунаалы оҥорууга Нам улууһун үөрэҕин салалтата, оскуола учууталлара, оҕо саадын иитээччилэрэ, бибилэтиэкэ үлэһиттэрэ кыттыыны ыллылар.
Нүөмэргэ Нам улууһуттан төрүттээх Саха сирин уһулуччулаах салайааччыта Илья Егорович Винокуров туһунан комикс, Нам улууһун суруйааччыларын, бэйиэттэрин айымньылара, улуус историята, араас кырыйыылаах, хамсаныылаах оонньуулар киирдилэр.
«Чуораанчык сурунаал 6-с №-ин бүгүн, Билии күнүнэн анаан, Нам оскуолаларыгар I-гы кылааска киирэр оҕолор бэлэх туттулар. Ол туһунан И. С. Гаврильев аатынан Нам I-кы №-дээх орто оскуолатын эдэр корреспондена Святослав Барабанов сырдатта:
Билии аартыгар бастакы хардыылар: Нам I-кы №-дээх орто оскуолатын бастакы кылааһын үөрэнээччилэрэ «Чуораанчык» сурунаал анал таһаарыытын туттулар. Балаҕан ыйын 1 күнэ – оскуола боруогун аан бастаан атыллыыр оҕолорго долгутуулаах уонна ураты күн. Нам улууһугар Билии күнэ өрөгөйдөөх линиэйкэлэринэн эрэ буолбакка, бырааһынньык сүрүн дьоруойдарыгар истиҥ үөрүүнү бэлэхтээбит кэрэ түгэнинэн бэлиэтэннэ. И. С. Гаврильев аатынан Нам I-кы №-дээх орто оскуолатын бастакы кылааһын үөрэнээччилэрэ оҕо-аймах сөбүлээн ааҕар «Чуораанчык» сурунаалын саҥа анал таһаарыытын бастакынан илиилэригэр туттулар. Бу нүөмэр бүтүннүү төрөөбүт-үөскээбит, кэлэр уон биир сыл тухары билиини ылыахтаах сирдэригэр – Нам улууһугар анаммыт.
Саҥа оскуола олоҕун кытта билсиһиини 1 «А» кылаас үөрэнээччилэрэ кылаастарын салайааччыта Потапова Александра Егоровна салалтатынан саҕалаатылар. Оҕолор паартаҕа олорон сурунаал чаҕылхай сирэйдэрин интэриэһиргээн арыйдылар. Бу кинилэргэ судургу бэлэх буолбакка, төрөөбүт кыраайдарын историятыгар уонна култууратыгар сирдиир дьиҥнээх уонна туһалаах суолдьут буолла.
Бу бырааһынньыктаах күн оскуола дириэктэрэ Николай Григорьевич Парников кырачаан үөрэнээччилэргэ алгыс тылларын анаата. Кини оҕолору билии киэҥ океанынан уһун уонна дьоллоох суолга бэйэтинэн атаарда, ситиһиилээх үөрэҕи уонна саҥа арыйыылары баҕарда. Оҕолор кэрэ-бэһиэлэй нөмөрдөрү көрөн олус үөрдүлэр уонна ураты болҕомтолорун иһин сурунаал эрэдээксийэтигэр истиҥник махтаннылар. Төрөппүттэр эмиэ бу махталы кытта үөрүүнү тэҥҥэ үллэһиннилэр. Алгыстаах бэлэх, кырачааннар бастакы оскуолатааҕы күннэрин умнуллубат гыммытын иһин «Чуораанчык» сурунаал кэлэктиибигэр махтаныы үрдүгүн тиэртилэр.
Кэскил14.ру