Бирисээгэ диэн тугуй? Хайдах быһыыга-майгыга ааһарый? Саллаат кимиэхэ, тугу андаҕайарый? Ис хоһооно туох диэний?
Бу ыйытыыларга Дьокуускай куорат 17 №-дээх орто оскуолатын VIII «В» кылааhын үөрэнээччилэрэ хоруйдууллар.
Толоруом, тутуһуом…
Хас биирдии ыччат 18 сааhын туоллаҕына, аармыйаҕа сулууспалыыра Ийэ дойдутун иннигэр ытык иэhэ буолар. Урукку өттүгэр байыаннай-морской флокка 3 сыл, оттон атын байыаннай чаастарга 2 сыл сулууспалаан кэлэллэрэ. Билигин – 1 сыл.
Сулууспаҕа ыҥырыллыбыт уолаттар, чаастарыгар тиийээт да, строевой бэлэми, байыаннай устаабы үөрэтэллэр.
Саллаат андаҕара – Ийэ дойдубун көмүскүүр, байыаннай кистэлэҥнэри арыйан биэрбэт, сулууспалыыр чааhым знамятын, бэйэбэр сыhыарыллыбыт сэрии сэбин харыстыыр, күннээҕи соругу, бэрээдэги тутуhар буолуом диэн кэс тылын биэриитэ. Хас биирдии саллаат бирисээгэни толоруохтаах, тутуhуохтаах.
Люда АММОСОВА.
Бар дьонун иннигэр
Сулууспалааччы: «Российскай Федерация Конституциятын хаhан да кэhиэм суоҕа, байыаннай устаабы, хамандыырдар, начаалынньыктар бирикээстэрин куруутун толоруом. Аҕа дойдум иннигэр ытык иэспин үчүгэйдик толоруом, Аҕа дойдум көҥүлүн, тутулуга суох буолуутун, Конституциятын, бэйэм норуоппун, дойдубун көмүскүөм!» – диэн андаҕайар. Ити курдук саллаат бар дьонун иннигэр тылын биэрэр.
Россия аармыйата сүдү күүстээх. Ол иһин да биһиги дойдубут кө-ҥүл, эйэ-дэмнээх кэмҥэ олоробут.
Камилл ИВАНОВ.
Долгуйан туран…
Россия аармыйатын кэккэтигэр сулууспалыыр эдэркээн уолаттар андаҕар тылларын ис-истэриттэн долгуйан туран этэллэр. Ол курдук, кинилэр сулууспаларын кэмигэр эппит тылларын кэһиэ суохтаахтар.
Дьиҥнээх эр киһи андаҕарын олоҕун тухары умнубат, бар дьонугар дурда-хахха буолар. Мин убайдарым иккиэн аармыйаҕа сулууспалаабыттара. Андаҕар этиэхтэрин иннинэ өр бэлэмнэммиттэр, үөрэппиттэр үһү. Олус долгуйбуппут диэн кэпсииллэр. Билигин үлэлии-хамсыы сылдьаллар, дьиэ кэргэн аҕалара.
Айсена БОРИСОВА.
Саллаакка ураты түгэн
Байыаннай бирисээгэ үөрүүлээх быһыыга-майгыга этиллэр. Саллааттар параднай формалаах, саалаах тахсан, плацка тураллар. Байыаннай чаастарын былааҕа, Россия судаарыстыбаннай былааҕа өрө тахсар. Саллааттар андаҕардарын иннинэ байыаннай чаас салайааччыта (хамандыыра) кылгастык тыл этэр. Кини бирисээгэни ылыныы хас биирдии саллаакка эппиэтинэстээх уонна бочуоттаах түгэн буоларын санатар.
Саллаат, строй, хамандыырдарын, табаарыстарын иннигэр тахсан, байыаннай бирисээгэни ааҕар уонна анал кинигэҕэ илии баттыыр. Ити кэннэ Аҕа дойдуну көмүскээччи үрдүк аатын сүгэр.
Байыаннай бирисээгэ (андаҕары ааҕыы) – байыаннай олох тутаах уонна тулхадыйбат сокуона.
Эрхан МОХОВ.
Сулууспалыы барыам?
Саха политехническай лиссиэй үөрэнээччитэ (V «А» кылаас) Данил ВАСИЛЬЕВ эр киһилии лоп бааччы тыллаах-өстөөх. Аармыйаҕа сулууспалыы барарга билиҥҥэттэн бэлэмнэнэр.
– Саллаат диэн кимий?
– Аҕа дойдуну көмүскээччи. Кини ийэ сирин туһугар олоҕун да кэрэйбэт. Оннук хорсун-хоодуот санаалаах буолуохтаах.
– Аармыйа олоҕун туһунан тугу билэҕин?
– Аармыйа уолаттары Ийэ дойдуну көмүскүүргэ, харыстыырга үөрэтэр. Онно күн аайы эрчиллэллэр, сүүрэллэр, ытарга үөрэнэллэр. Сэрии саҕаланар түгэнигэр дойдуларын көмүскүүргэ бэлэмнэниини ааһаллар.
– Улааттаххына, ханна сулууспалыы барыаҥ этэй?
– Мин ВДВ сулууспалыы барыам.
– Уол оҕо хайдах буолуохтааҕый?
– Сытыы өйдөөх, түргэн, күүстээх. Кими да албыннаабат, сырдыкка эрэ тардыһыахтаах. Туохха барытыгар бэлэм буола улаатыахтаах. Уол оҕоттон дьиэ кэргэнин, дойдутун көмүскүүр, чугас дьонун көрөр-харайар, иитэр киһи тахсыахтаах.
– Чугас дьоҥҥор тугу көмөлөһөҕүн?
– Мас хайытабын, аҕабын кытта бултуу барсабын, массыына өрөмүөннүүргэ көмөлөһөбүн. Кыһын тиэргэним хаарын күрдьэбин. Сайын оттоһобун.
Кэпсэттэ Айыына КСЕНОФОНТОВА.