Алтынньы ый 10 күнүгэр, Дьокуускай куорат 17 №-дээх орто оскуола 6 «Г» кылаас уолаттара аҕаларын кытта «Айылҕалыын алтыһыы» диэн айаҥҥа Кэнкэмэҕэ баран кэллилэр. Бу тэрээһини кылаас салайааччыта Алена Александровна, аҕа уонна уол оҕо ситимнэрин бөҕөргөтүүгэ, оҕо орто сааһыттан өйө-санаата сайдыытыгар эр киhи, аҕа улахан көмөнү оҥороругар бу айан улахан оруоллааҕын быһааран, көҕүлээн, санаатын уган биэрдэ.
Бу тэрээһини кылаас саамай көхтөөх аҕата, Николай Степанович Попов ылына охсон, барытын тэрийсэн, аҕалары түмэн, «Саха сирин ураты харыстанар сирдэр» салалталарын кытта тэҥҥэ биир сүбэнэн, үрдүк таһымнаахтык тэрийэн ыыттылар.
Айылҕалыын алтыһыы» тэрээһин сыала–соруга: бэйэ–бэйэни кытта ыкса билсии, сатыы айылҕа ыллык суолунан хаамыы, манна кыстыыр кыыллар олохторун, уратыларын көрүү–истии киирдэ. Бу күн ирэ–хоро кэпсэтэн, эти–сиини чэбдигирдэн, билиилэрин хаҥатан, аҕалар да, үөрэнээччилэр да бу күннэрин туһалаахтык атаардылар. Ол курдук кылаас улахан аҥаара уолаттар, бэйэ–бэйэлэрин кытта ыкса билсэн, аҕалар сыһыаннарын, кэпсэтиилэрин, туттууларын–хаптыыларын көрөн–истэн, элбэх сонуну, саҥаны истэн-билэн кэллилэр. Бастакы хардыы оҥоһулунна, иккис баҕабыт кылаас иһинэн «Муҥха бырааһынньыга» тэрээһини тэрийии былааннааҕын Алена Александровна үөрэ кэпсээтэ.
«Уол оҕо аҕатын туйаҕын хатарыаҕа», – диэн сахалыы өс хоһооно уол оҕону аҕата эрэ үөрэтиэхтээҕин чуолкайдык быһааран биэрэр. Маннык оҕо уонна аҕа биир санаалаах буолуулара оҕо улаатан иhэн аҕатын ордук сөбүлүүр буолуутугар, кини этэр тылын сыаналыырыгар уонна үөрэҕин ылынарыгар тириэрдэр.
Дьокуускай куорат 17 №-дээх орто оскуола 10 «В» кылаас үөрэнээччитэ Татьяна Олесова