Тохсунньу 17-18 күннэригэр С.К. Макаров аатынан Чурапчы гимназиятыгар улуустааҕы баскетбол күрэҕэ буолла. Чурапчы, Дириҥ, Төлөй, Хатылы, Сылаҥ оскуолаларыттан 12 хамаанда кытынна. Уолаттарга – 7, кыргыттарга 5 хамаанда күөн көрүстэ.
Сүүрүүлээх-көтүүлээх, тыҥааһыннаах күрэхтэһии түмүгүнэн кыргыттар хамаандаларын икки ардыларыгар бастакы миэстэни Г.П. Башарин аатынан Сылаҥ оскуолатын хамаандата ылла. Иккис миэстэҕэ С.К. Макаров аатынан Чурапчы гимназиятын хамаандата, үһүс миэстэҕэ В.С. Соловьев-Болот Боотур аатынан Хатылы оскуолатын хамаандата таҕыста.
Уолаттарга С.К. Макаров аатынан Чурапчы гимназиятын хамаандата бастыҥынан ааттанна. Иккис миэстэни И.М. Павлов аатынан Чурапчы оскуолатын хамаандата, үһүс миэстэни С.А. Новгородов аатынан Чурапчы оскуолатын хамаандата ылла.
Кылаабынай судьуйа Чурапчы гимназиятын физкультура учуутала Николай Николаевич Романов күрэхтэһии үчүгэйдик ааспытын бэлиэтиир: «Оҕолор кыахтарын, таһымнарын көрдөрдүлэр. Хамаандалар кыайыы иһин дьоһуннук кииристилэр. Маладьыастар! Бу күрэх түмүгүнэн салгыы өрөспүүбүлүкэтээҕи күрэххэ кыттар оҕолору талыахпыт».
Мин санаабар, баскетбол олус сылаалаах спорт көрүҥэ. Күүскэ бэлэмнэниэххэ наада. Күрэххэ хамаандалар бэртээхэйдик оонньоотулар. Бары бэлэмнээхтэр, онон сэргэх оонньуулар буоллулар.
Ааптар Валерия СТЕПАНОВА, VII кылаас;
Уля СТЕПАНОВА, Вилена СТРУЧКОВА, Винея БАРАШКОВА
хаартыскаҕа түһэриилэрэ, VIII кылаас
«Тумус кыһа” пресс-киин,
С.К. Макаров аатынан Чурапчы гимназията