Биһиги IV кылаас үөрэнээччилэрэ быйыл алын кылааһы бүтэрэбит. Учууталбытыгар Татьяна Николаевна Зыряноваҕа махтанан туран, кини туһунан кэпсиэхпин баҕарабын.
Татьяна Николаевна алын кылаас учууталынан 30-тан тахса сыл үлэлээбит. Бастаан оскуолаҕа киирэрбитигэр наһаа эйэҕэстик көрсүбүтүн өйдөөн хаалбыппын. Киэҥ баҕайы спортивнай саала иһигэр I «Г» диэн табличкалаах турарын өйдүүбүн. Ол күн наһаа долгуйбутум. Учууталбыт бастакы уруокпутугар өҥнөөх кумааҕыга илиибитин уруһуйдаппыта. Ону кырыйан күн оҥорбуппутун өйдүүбүн.
Татьяна Николаевна наһаа кыһамньылаах. Хас биирдиибитигэр болҕомтотун уурар. Түөрт сыл устата биһигини ааҕарга, суруйарга, ахсаан суоттуурга үөрэттэ. Киһи өйдүүр гына быһаарар. Онон үөрэхпэр үчүгэйбин. Саҥа тиэмэни түргэнник өйдөөччүбүт.
Татьяна Николаевна төрөөбүт дойдубутун, ийэ тылбытын таптыырга үөрэппитэ. «Кинигэтэ ааҕыҥ»диэн наар сүбэлиир.
Түөрт сыл устата оскуолаҕа үөрэнэммин учуутал киһиэхэ иккис ийэбит кэриэтэ буоларын биллим.
Алын кылааһы бүтэрэрбититтэн эмиэ да хомойобут. Тоҕо диэтэххэ, учууталбытын кытта арахсабыт. V кылааска хас предмет аайы атын атын учууталлар үөрэтиэхтэрэ. Улахан кылааска тахсан да баран мин маҥнайгы учууталбын олох умнуом суоҕа, кини эппитин өйдүү сылдьыам. Киниэхэ махталым муҥура суох.
Артем СЕДАЛИЩЕВ, IV «Г» кылаас, С.А. Новгородов аатынан Чурапчы орто оскуолата.