Спорт эти-хааны чэбдигирдэрин таһынан, сайдыыны эмиэ биэрэр. Ол биһиги нэһилиэкпит оскуолатын холобуругар көстөр.
Петр Митрофанович Васильев аатынан Соловьев орто оскуолатыгар быйылгы үөрэх дьылыгар «Боотур кыһата» диэн программанан атах оонньууларыгар дьарыктанар оҕолорго анаан интернат арыллыбыта. Тренеринэн Саха өрөспүүбүлүкэтин физическэй култуура туйгуна Иван Иванович Чиркоев үлэлиир. Интернат 15 миэстэлээх. Спорт национальнай көрүҥэр дьарыктаныан, үрдүк чыпчааллары ситиһиэн баҕарар оҕолор улуус бары нэһилиэктэриттэн кэлэн, интернакка олорон, бастыҥ тренергэ дьарыктаналлар. «Интернат арыллан, үлэ миэстэтэ таҕыста, барыы-кэлии үксээтэ, сэргэхсийдибит», – диэн нэһилиэкпит дьоно этэллэр.
Соторутааҕыта Чурапчытааҕы спорт институтун устудьуона Илана Никитина биһиги оскуолабытыгар практикатын түмүктүүр күрэҕэ буолан ааста. V-VII, VIII-XI кылаастар куобах, кылыы, ыстаҥа көрүҥнэригэр күрэхтэстилэр. Уопсайа16 оҕо кыттыыны ылла.
Үс көрүҥ түмүгүнэн уолаттарга VIII-XI кылаастарга бастакы миэстэни Дархан Собакин, иккиһи Максим Владимиров ыллылар. V-VII кылаас уолаттарыгар Дима Красильников бастаата. Арчын Собакин иккис, Мурат Владимиров үһүс буоллулар.
V-VIII кылаас кыргыттарыгар бастакы миэстэни Сайаана Борисова, иккис миэстэни Ангелина Кривошапкина, үһүс миэстэни Вика Собакина ылары ситистилэр.
Күрэх түмүгүн оскуолабыт дириэктэрэ Семен Иванович Собакин, тренербит Иван Ивнович Чиркоев уонна Илана Никитина санааларын үллэһиннилэр. Мырылаҕа интернат арыллан, усулуобуйа тэриллэн, улууска, өрөспүүбүлүкэҕэ атах оонньууларын көрүҥүн сайыннарыахтаахпыт. Бу биһиги оскуолабыт иннигэр турар улахан сорук, эппиэтинэс. Атах оонньууларыгар дьарыктаныан баҕалаах оҕолору Мырыла нэһилиэгэр күүтэбит.
Маша СОБАКИНА, VII кылаас, Надя СЕМЕНОВА IX кылаас,
Айыына ЮМШАНОВА, VIII кылаас, Мырыла, Чурапчы.