Өрөспүүбүлүкэттэн чаҕылхай, айар куттаах уонна креативнай 100-тэн тахса оҕо «Сосновай бор» лааҕырга бииргэ муһуннулар. Биһиги Кэбээйи орто оскуолатыттан биэс буолан «Медиавызов» диэн сменаҕа икки нэдиэлэ устата үөрэнэ, сайда кэллибит.
Бу күннэргэ «Кэскил» хаһыат үлэһиттэрэ журналист идэтин, видеоны хайдах устары, монтажтыыры, интервью ылары уонна хаһыакка ордук тугу суруйуохха сөбүн олус интэриһинэйдик кэпсииллэр, сүбэ-ама биэрэллэр.
Уопсайа 4 академиянан арахсан, интэриэспитинэн көрөн, араас дьарыктарга сылдьабыт. Үөрэҕи таһынан сөбүлээн уруһуй, ырыа куруһуогар сылдьан, элбэх оҕону кытта билистим. Күн аайы академиябытынан арахсан, олус сэргэх баһаатайдардарбыт араас оонньуулары оонньотоллор, күннээҕи үлэбитин ырытарбытын, былаанныырбытын астына сылдьабыт.
Сменабыт үөрүүлээх арыллыыта олус үчүгэйдик ааста. Ыалдьыттарынан «Snowvoice» диэн уолаттар бөлөхтөрө эҕэрдэлээн бардылар.
Биһигини өссө да интэриэһинэй, чаҕылхай күннэр күүтэллэр. Контент оҥоруу кистэлэҥнэрин, саҥарар дьоҕуру сайыннарар дьарыктары, фотографтары, SMM-менеджердары, корреспонденнары кытта көрсүүһүнү уонна өссө да элбэх оонньуулары, күрэхтэри долгуйа күүтэбит!
Сайаана ТЕРЕХОВА, 8 кылаас үөрэнээччитэ,
«Нон-стоп» академия иитиллээччитэ,
«Дьоҕур» пресс-киин, Кэбээйи орто оскуолата.