Саҥа үүммүт 2022 сылы биһиги Ил Дархаммыт республикаҕа Ийэ сылынан биллэрбитэ мээнэҕэ буолбатах. Ийэ баар күн сиригэр саамай күндү киһи, кини баар буолан биһиги баарбыт, кини баар буолан биһиги үөрэнэбит, оонньуубут, эмтэнэбит, үлэлиибит, идэ ылабыт.
Мин ийэм Татьяна Анатольевна Брызгалова. Кини Табаҕатааҕы искусство оскуолатын дириэктэринэн үлэлиир, идэтинэн технология, черчение учуутала. Мин ийэм олус эйэҕэс, бэһиэлэй, сырдык ыраас дууһалаах, үчүгэй үлэһит, быйыл уон иккис сылын үлэлии сылдьар. Үлэтигэр олус бэриниилээх, саҥаны, сонуну киллэрэ сатыыр.
Мин ийэм тас көрүҥүнэн сүрдээх кыраһыабай, үрдүк уҥуохтаах. Кини наһаа үчүгэйдик, бэйэтигэр барар гына таҥнар. Убайым биһиккини эмиэ оннук таҥыннара сатыыр.
Ийэм олус үчүгэйдик иистэнэр, аҕабар үтүлүк, убайбар уонна миэхэ араас маскарааттары тигээччи. Өссө кини олус минньигэстик астыыр, араас салаттары, язычогу оҥорор. Ону таһынан үчүгэйдик уруһуйдуур, арааһынай оҥоһуктары оҥорору сатыыр, биһигини оригамига, уруһуйдуурга үөрэтэр.
Мин ийэбинээн бииргэ сылдьарбытын наһаа сөбүлүүбүн, ол курдук дьиэ кэргэнинэн бары Крымҥа бара сылдьыбыппыт, Симферополь, Бахчисарай, Ялта, Херсонес, Севастополь куораттары көрбүппүт, Саха сиригэр Аммаҕа, Батамайга, «Орто дойдуга» сынньаммыппыт, куоракка киирдэхпитинэ кинотеатрга, циркаҕа, музейга, «Планета Кидс» диэн оонньуур сиргэ сылдьааччыбыт. Бары бииргэ айылҕаҕа сынньанарбытын, алааспытыгар оттуурбутун, дьэдьэннии, отоннуу, тэллэйдии барарбытын олус сөбүлүүбүт, маны барытын ийэбит наһаа үчүгэйдик, киһи астынар гына тэрийээччи.
Биһигини ийэбит бэрээдэктээх уонна эйэҕэс буоларга, дьоҥҥо көмөлөһөргө, үлэни таптыырга үөрэтэр. Мин ийэм олус үчүгэй, кинини наһаа таптыыбын уонна убаастыыбын!
Күндү ийэбин кэлэн иһэр Аан дойду дьахталларын күнүнэн эҕэрдэлиибин, үчүгэй доруобуйаны, элбэх да элбэх ситиһиилэри уонна наар үөрэ-көтө сылдьарын баҕарабын!