Бу билигин, субу мүнүүтэҕэ, Чөркөөх нэһилиэгэр Саха Өрөспүүбүлүкэтин норуодунай суруйааччыта, Социалистическай Үлэ Геройа Дмитрий Кононович Сивцев — Суорун Омоллоон төрөөбүтэ 115 сылыгар аналлаах тэрээһин буола турар. Тэрээһиҥҥэ Н.Е.Мординов — Амма Аччыгыйа аатынан «Кэскил» оҕо бэчээтин кыһатын аатыттан сүрүн эрэдээктэр Татьяна Ильинична Жиркова, «Чуораанчык» оҕо сурунаалын эппиэттиир сэкирэтээрэ Сардаана Анатольевна Матвеева кыттыыны ыллылар.
Оҕо-аймах тапталлаах сурунаала «Чуораанчык» сурунаал «Суорун Омоллоон 9 олуга» анал таһаарыыны сүрэхтээтэ. Бу Таатта улууһун дьаһалтатын, Таатта улууһун норуот айымньытын дьиэтин кытта «Кэскил» оҕо бэчээтин кыһатын, «Чуораанчык», «Колокольчик» сурунааллар эрэдээксийэлэрин кытта холбоһуктаах таһаарыы буолар.
Анал таһаарыы сүрүн сүбэһитинэн уопсастыбанньык, суруналыыс, Суорун Омоллоон айар үлэтин ырытааччы, Ытык Күөл олохтооҕо Петр Иванов-Сиэрэй Маасса буолар.
«Убаастыыр, ытыктыыр, сүгүрүйэр киһибитин Суорун Омоллоону 9 өттүттэн арыйан көрдөрдүбүт. Анал сыһыарыыга киирбит бэчээттээммит үлэлэр ааптардарыгар сертификат туттардыбыт», — эппиэттиир сэкирэтээр Сардаана Матвеева иһитиннэрэр.
Бу үөрүүлээх тэрээһиҥҥэ оскуола оҕолоро, учууталлар, нэһилиэк олохтоохторо көхтөөх кыттыыны ыллылар.
Суорун Омоллоон төрөөбүтэ 115 сылыгар аналлаах тэрээһиннэр салгыы ыытылла тураллар.