Таатта Харбалааҕын Н.Е Мординов-Амма Аччыгыйа аатынан үөрэхтээһин холбоһугар саха норуодунай суруйааччыта Н.Е.Мординов-Амма Аччыгыйын сырдык аатын үйэтитэр бюһун арыйыы сиэрэ-туома буолла.
Бу тэрээһиҥҥэ Дьокуускай куораттан «Чолбон» сурунаал сүрүн редактора, Россия Суруйааччыларын союһун бырабылыанньатын сэкирэтээрэ, Саха сирин Суруйааччыларын сойууһун бэрэссэдээтэлин солбуйааччы Гаврил Андросов кыттыыны ылла. «Кэскил” оҕо бэчээтин кыһатын бэлэхтэрин үөрүүлээх быыһыыга-майгыга туттарда.
Амма Аччыгыйын кытта үгүстүк алтыспыт норуодунай суруйааччы В.Е.Васильев-Харысхал кэлэн олус сонун ахтыыны оҥорон киэргэттэ.
СӨ култууратын туйгуна, үөрэнээччибит Виталий Очиров тэрээһини алгыһынан арыйда, улуус баһылыга М.М.Соров эҕэрдэлээтэ.
Муза Николаевна Мординова оҕолорун кытта эҕэрдэлэрин, махталларын долгуйа иһиттибит, Мординовтар аймах ааттарыттан А.Т.Мординов, харчынан кыттыһан, бюһу оҥотторууга бачыымы көтөхпүт 1975 сыллаах выпустар ааттарыттан И.В.Харлампьева, нэһилиэк баһылыга А.И.Кулачиков, ААО «Төлөн директора” П.Д.Рахлеев, учуутал Д.Е.Соломонова, холбоһук дириэктэрэ В.В.Кривошапкин эҕэрдэ тылларын эттилэр.
Дириэктэр В.В.Кривошапкин саха норуодунай суруйааччыта Н.Е. Мординов-Амма Аччыгыйа төрөөбүтэ 115 сылын көрсө ыытыллар үлэ былаанын билиһиннэрдэ:
— Сыала: Саха норуотун сээркээн сэһэнньитин сырдык аатын үйэтитии; Норуодунай суруйааччы айар олоҕун, үлэтин туһунан үүнэр көлүөнэҕэ тиэрдии, айымньыларынааҕыыны,чинчийиини тэрийии; Үйэтитиигэ дириҥник ылсан үлэлээһин.
Ыытыллар үлэлэр: 1.Төрөөбүт дойдутугар аатын сүгэр оскуола иннигэр сквер оҥоруу.2. С.А.Новгодов аатынан «Бичик» кинигэ кыһатын кытта бииргэ үлэлээн, «Онус тоҕо?» оҕолор айымньыларын бэчээттэтии. «Киһи уонна айымньы» кинигэни хос бэчээттэнэн тахсарын ситиһии. 3. Киэн туттар биир дойдулаахпыт олоҕун, айар үлэтин киэҥник хабан үөрэтэри, айымньыларын ааҕыыны тэнитэр сыаллаах «Амма Аччыгыйа уонна билиҥҥи кэм» диэн оҕо аймах өрөспүүбүлүкэтээҕи түһүлгэтин тэрийии. 4. Н.Е. Мординов-Амма Аччыгыйа аатын сүгэр «Кэскил» хаһыаты кытта бииргэ үлэлээһин.
Үөрүүлээх тэрээһин кыттыылаахтара үлэ былаанын дохсун ытыс тыаһынан ылыннылар.
Сүрдээх истиҥ-иһирэх тэрээһини Виталий Очиров ырыаларынан киэргэтэн сэргэхситтэ,саха тылын учуутала В.С.Кривошапкина хомоҕой тылынан иилээн-саҕалаан тэрийэн ыытта.
Ааптар: Валентина Кривошапкина. Харбалаах, Таатта.