Соторутааҕыта биһиги оскуолабытыгар Чурапчытааҕы аграрнай-техническэй колледж дириэктэрэ Василий Васильевич Гуляев, колледж үлэһиттэрэ Татьяна Владимировна Алексеева, Клара Ивановна Попова ыалдьыттаатылар. Оҕолорго, учууталларга, төрөппүттэргэ колледж туһунан билиһиннэрдилэр.
Чурапчытааҕы аграрнай-техническэй колледж 9-с, 11-с кылаастар выпускниктарын тыа хаһаайыстыбатын, техническэй хайысхаларга орто анал идэлэргэ үөрэтэр. Көрсүһүүгэ кэпсээбиттэринэн, колледж устудьуоннара демонстрационнай эксээмэн, кылгатыллан, «демо-эксээмэн» туттараллар. Бу колледжтарга, техникумнарга туттулар судаарыстыбаннай түмүктүүр аттестация ньымата. Уратыта диэн колледж выпускнига баһылыахтаах идэтигэр туһааннаах практическай сорудахтары толороллор. Ол барыта анал критерийдэринэн сыаналанар. Ситспит бааллара судаарыстыбаннай түмүктүүр аттестацияҕа учуоттанар. 100 баалы ылбыт выпускник Саха Өрөспүүбүлүкэтин Ил Дархана оскуола выпускниктарыгар олохтуур 100 тыһ. солк. бириэмийэтин тутар үрдүк чиэскэ тиксэр.
Чурапчытааҕы аграрнай-техническэй колледж социальнай партнердары кытта күүскэ үлэлиир эбит. Холобур, «Чурапчы» ТХПК-та, судноны тутар-өрөмүөннүүр Жатайдааҕы судоверфь курдук улахан тэрилтэ. Бу тэрилтэлэри кытта дуогабар түһэрсэн, оҕолор үөрэхтэрин кэнниттэн онно үлэҕэ киирэллэр. Сварщик идэтин баһылаабыт оҕолор практикаларын Жатайдааҕы судоверфькэ бараллар, хараабыллары тутарга, өрөмүөннүүргэ үлэлииллэр.
Көрсүһүү кэмигэр колледж дириэктэрэ Василий Васильевич Гуляев уонна оскуолабыт дириэктэрэ Петр Петрович Тарасов бииргэ үлэлиир дуогабарга илии баттастылар. Онон Хадаар оскуолатын үөрэнээччилэрэ Чурапчытааҕы аграрнай-техническэй колледж базатыгар үөрэнэн, оскуоланы бүтэрэллэригэр рабочай идэни баһылаан, ону туоһулуур сибидиэтилистибэлээх буолуохтара.
Колледж биир сүрүн хайысхата – аграрнай. Онон сүөһүнү, үүнээйини, сири-уоту көрөр-истэр идэлээх дьону эмиэ иитэн таһаарар. Урут бу идэлэргэ үс сыл үөрэнэр буоллахтарына, билигин профмастерствоҕа көһөн, 2 сыл 6 ый үөрэнэллэр. Түмүктүүр эксээмэннэрин өрөспүүбүлүкэ улахан тэрилтэлэрин салайааччылара кэлэн туталлар.
Маны таһынан, Чурапчытааҕы колледж 8-11 кылаас үөрэнээччилэрэ матасыыкыл ыытар праваҕа эмиэ үөрэтэр. Биһиги оскуолабытыттан 8 оҕо үөрэнэр баҕалаах. Теорияны учуутал Иннокентий Васильевич үөрэтэр, онтон практикаларын Одьулууҥҥа ааһаллар.
Оҕолор, төрөппүттэр, учууталлар буолан ааспыт көрсүһүүнү олус сэҥээрдибит. Оскуолабыт дириэктэригэр Петр Петрович Тарасовка махтанабыт. Икки сыл устата туруорсан, Чурапчытааҕы аграрнай-техническэй колледжы кытта бииргэ үлэлииргэ дуогабар түһэрсэн, оҕолорго саҥа үктэли, улахан кыаҕы биэрбитигэр.
Алена КСЕНОФОНТОВА, X кылаас,
С.Д. Флегонтов аатынан Хадаар орто оскуолата, Чурапчы