Үлэҕэ, идэҕэ бэриниилээх дьон баар буолан биһиги олохпут сайдар. Кинилэр баар буолан, көлүөнэ ситимэ салҕанар. Мин үөрэнэр С.Ф. Гоголев аатынан Дьокуускайдааҕы педколледжпар оннук киһинэн Альбина Афанасьевна Пилецкая буолар. Санаан көрүҥ – кини биһиги педколледжпытыгар 56-с сылын үлэлиир. Саамай кэрэхсэбиллээҕэ диэн кини аҕата Афанасий Егорович Иванов 1938 сыллаахха биһиги педколледжпытыгар киирэн, бу училищены бүтэрбит уонна үс сыл буолан баран, 1941 сыллаахха Аҕа дойду Улуу сэриитигэр аттаммыт. Баянын туппутунан сэрии толоонун ортотунан Кёнигсберка тиийэ сэриилэспит. Дойдутугар эргиллэн кэлэн баран, музыка учууталынан үлэлээбит.
Аҕатыттан ситимнэммит кэрэҕэ тардыһыы холобурун ыччаты иитиигэ олоҕун барытын анаабыт Альбина Афанасьевна Пилецкая Саха сирин музыкальнай эйгэтигэр улахан буукубаттан суруллар сүдү учуутал. Кини бэйэтэ кэпсииринэн, олоҕун суола быыкаа эрдэҕиттэн быһаарыллыбыт. Музыка кини дьиэтигэр мэлдьи тыаһыыра. Аҕата Афанасий Егорович Иванов кыыһыгар талаанын эрэ буолбакка, музыканы педагогика нөҥүө дьоҥҥо сатаан тиэрдэри кытта иҥэрбитэ.
Альбина Афанасьевна оскуоланы Булуҥ улууһун Күһүүрүгэр бүтэрбитэ уонна тута Улан-Удэ куоракка Илин Сибиирдээҕи култуура судаарыстыбаннай институтугар дирижерскай-хоровой факультекка үөрэнэ киирбитэ. 1971 сыллаахха дипломун көмүскээн баран, идэлээх музыкант буолан баран, кэргэнинээн А.Д. Пилецкайы кытта Дьокуускайдааҕы педагогическай училище боруогун атыллаан үлэтин саҕалаабыта. Ол кэмтэн ыла кини харыс да сири хамсаабакка, педколледжка учуталлыы сылдьар.
Биһи педколледжпытыгар 56-с сылын үлэлии сылдьар Альбина Афанасьевна Пилецкая 80 сааһын туолар үөрүүлээх үбүлүөйүн Дьокуускайдааҕы педколледж улахан коллектива бары үөрэн-көтөн, долгуйан туран бэлиэтээтибит.
Бу сыллар тухары Альбина Афанасьевна эдэр преподавательтан музыкальнай отделение сэбиэдиссэйигэр (1990-2004 сс.) уонна цикловай комиссия салайааччытыгар тиийэ үүммүтэ. Кини сүүһүнэн талааннаах үөрэнээччилэргэ «ийэ» буолбута. Кинилэр ортолоругар Саха Өрөспүүбүлүкэтин норуотун артыыһа Герман Хатылаев, эстрада сулустара Саина, Екатерина Алексеева, Варя Максима, «Туймаада» уолаттар судаарыстыбаннай ансаамбылын солистара курдук биһиги өрөспүүбүлүкэбитин ааттаппыт ырыаһыттар бааллар.
Бырааһынньык күнэ сүдү күүстээх аккордтартан саҕаланна. Үөрүүлээх чааһы Альбина Афанасьевна профессиональнай үлэтин биир саамай сүрүн миэстэни ылар «Дуораан» эр дьоннор хордарын ансаамбыла арыйда. Кинилэр куоластарын дорҕооно Альбина Афанасьевна педагогическай өрөгөйүн бастыҥ бигэргэтиитэ буолла: көлүөнэлэр утумнара тыыннаах, хоровой искусство сайдар кэскиллээх. «Айар Саас» үҥкүү бөлөҕө олус кэрэ дириҥ ис хоһоонноох хотугулуу үнкүүнү бэлэхтээтэ.
Дьокуускайдааҕы педколледж дириэктэрэ Изольда Ивановна: «Альбина Афанасьевна, улахан уопутуҥ, муудараһын иһин махтал! Күн аайы эйигин кытта кэпсэтэрбит, эйигин күннэтэ көрсөн алтыһарбыт эн баай уопуккун, дириҥ билиигин-көрүүгүн ылынарбытыгар үөрэтэр», – диэн этэн туран үбүлүөйдээх ытык киһибитигэр педагогическай колледж Үрүҥ көмүс мэтээлин туттарда.
Альбина Афанасьевнаны эҕэрдэлии үрдүк дуоһунастаах ыалдьыттар СӨ Государственнай Мунньаҕын (Ил Түмэн) Хотугу сир аҕыйах ахсааннаах норуоттарын боппуруостарыгар уонна Арктика дьыалаларыгар бастайааннай комитетын бэрэссэдээтэлэ Елена Христофоровна Голомарева, «Биир Ньыгыл Россия» партия сэкэрээтэрин солбуйааччы кэлбиттэрэ кини личноһын далааһынын тоһоҕолоон бэлиэтээтилэр.
РФ норуотун үөрэҕириитин уонна наукатын үлэһиттэрин идэлээх сойуустарын СӨ тэрилтэтин тэрийэр салаатын сэбиэдиссэйэ Анна Афанасьевна Попова: «Манна тыл этэрбиттэн олус үөрэбин уонна өрөспүүбүбүкэ духуобунай култууратын сайыннарыыга сүҥкэн кылааты киллэрбит дьиҥнээх үлэ киһитэ буоларын туһунан бэлиэтээн этэрбиттэн олус үөрэбин. Эһиги Саха сирин дойду иһигэр эрэ буолбакка, тас дойдуларга көрдөрөр бачча талааннаах дьону иитэн-үөрэтэн таһаарбыккыт. Ону дириҥник сыаналыыбыт, махтанабыт! Эйиэхэ бөҕө доруобуйаны, хас күн аайы чугас дьонун, аймахтарын, үөрэнээччилэрин ситиһиилэрэ үөрдэ турдуннар», – диэн бэлиэтээн эттэ уонна өр сыллаах үтүө суобастаах үлэтин, үөрэххэ уһулуччулаах кылаатын иһин «Килбиэннээх үлэтин иһин» мэтээли туттарда.
Бырааһынньык истиҥ эҕэрдэ кэккэтинэн салҕанна. Бу күн Саха сирин араас муннуктарыттан, дойдубут араас куораттарыттан эҕэрдэ видеоларын ыыппыт араас сыллардааҕы выпускниктар куоластара иһилиннэ. Бэйэлэрин эҕэрдэлэрин «Туймаада» вокальнай ансаамбыл солистара, Мирослав Егоров, опера уонна балет театрын солистката Анегина Дьяконова, «Дьүрүскэн оһуор» ансаамбыл кыттыылаахтара, ону тэҥэ СӨ искусствотын үтүөлээх деятелэ Людмила Шумилова салайааччылаах Саха сирин филармониятын симфоническай хора эҕэрдэлээтилэр.
Саамай кистэлэҥ, нарын, долгутуулаах тыллар Альбина Афанасьевна аймахтарыттан, чугас дьонуттан иһилиннилэр, кинилэргэ Альбина Афанасьевна искусство сырдыга эрэ буолбакка, тапталлаах ийэ, эбэ, хос эбээ, дьиэ кэргэн тирэҕэ.
Оҕо үлэһит буолан үүнэн тахсарыгар дьиэ кэргэнэ хайдахтаах курдук улахан оруолу оонньуурун бу күн мин өссө төгүл итэҕэйдим. Альбина Афанасьевна аҕатыттан ситимнэммит кэрэҕэ айана Сахабыт сирин музыкальнай култууратын сайыннарбыта, искусствоҕа бэриниилээх идэтийбит дьоннору иитэн таһаарбыта.
Александр ФЕДОРОВ, С.Ф. Гоголев аатынан
Дьокуускайдааҕы педколледж 1 куурсун устудьуона