Бүгүн, балаҕан ыйын 27 күнэ, Саха сиригэр биир бэлиэ күнүнэн буолар — Судаарыстыбыннас күнэ.
1990 сыллаахха бу күн өрөспүүбүлүкэ суверенитетын Декларациятын ылыныы буолбута, ол ылыныы өрөспүүбүлүкэ сайдар суолугар саҥа тыыны биэрбитэ.
Сахабыт сирин бары муннуктарыгар бу күн араас тэрээһиннэр, Исидор Барахов, М.К. Аммосов уонна Ойуунускай пааматынньыктарыгар сүгүрүйүү бэлиэтэ ыытыллаллар.
Ол курдук, Саха Өрөспүүбүлүкэтин Судаарыстыбаннаһын күнүгэр аналлаах тэрээһин чэрчитинэн, Үөһээ Бүлүү улууһун Дүллүкү орто оскуолатыгар алын кылаас оҕолоро өрөспүүбүлүкэбит былааҕын, дьаралыгын, өрөгөй ырыатын уонна Саха сирин салайааччыларын туһунан көрдөрөн кэпсээтилэр.
Орто уонна үрдүкү кылаас үөрэнээччилэрэ биһиги дойдубутугар төрүт былыргыттан олохсуйан олорор омуктар тустарынан сырдаттылар. Кылаастарынан бэлэмнэнэн саха, эбээн, эбэҥки, чукча, дьүкээгир, долган, нуучча омук туһунан иһитиннэриилэри оҥордулар.
Олохтоох омуктар устуоруйаларын, олохторун-дьаһахтарын, култуураларын туһунан элбэҕи биллибит. Кинилэр дьарыктарыгар, таҥаска-сапка, тылга-өскө майгыннаһар уонна уратылаһар өрүттэрин көрдүбүт- иһиттибит.
Кылаастар көрдөрөр-сэһэргиир матырыйаал оҥостон, таҥнан-саптан көхтөөхтүк кытыннылар.
Төрөөбүт дойду устуоруйатын билии билиҥҥи кэми анаарарга, кэлэр кэми кэрэһилииргэ сирдиир.
Кэскил14.ру