Быйылгы үөрэх дьылыгар оскуолабытыгар маҥнайгы кылааска 4 оҕо үөрэнэ киирдэ.
Кинилэргэ бу күн ураты долгутуулаах: бүгүҥҥү күнтэн саҕалаан, оскуола олоҕун аан бастыкытын, саҥа, умсугутуулаах аартыгын атыллаатылар. Кылаас салайааччынан Федулова Анна Петровна ананна. Бу кэрэ түгэҥҥэ үтүө үгэһинэн оскуола салалтата уонна ытыктабыллаах ыалдьыттар оҕолору эҕэрдэлээтилэр. Ону таһынан, саҥа оскуолаҕа киирбит оҕолорго үөрүү тосхойон, сэмэй бэлэхтэри туттардылар. Өр сылларга үлэлээбит бэтэрээннэргэ уонна учууталларга Билии күнүнэн сибээстээн, оҕолор анал бэлэхтэри, кэрэ сибэкки дьөрбөтүн туттардылар.
Маҥнайгы кылаас оҕолоро «Орлята России» хамсааһын саҥа чилиэннэринэн буоллулар. Кинилэр үөрүүлээх быһыыга-майгыга бэйэлэрин бастакы андаҕардарын эттилэр. Ону таһынан, «Навигаторы детства» тирэх киин «Самолётик будущего» Бүтүн Арассыыйатааҕы аахсыйатын чэрчитинэн быйылгы ХI кылаас оҕолоро алын кылаас оҕолоругар оҥоһук сөмөлүөттэри туттартаатылар.
Тэрээһин бүтүүтэ оскуола оҕолоро бары бииргэ оскуола иннигэр туран быйылгы үөрэх дьылыгар баҕа санааларын этэн бэйэ оҥоһук сөмөлүөттэри ыыттылар.
Бары үөрэнээччилэргэ ыра санааларын толороллоругар, талааннарын арыйалларыгар, хас биирдии күннэрин чаҕылхай түгэннэринэн , саҥа арыйыыларынан толороллоругар баҕарабыт. Бу үөрэх дьыла эһиэхэ чаҕылхай кыайыылары, умсугутуулаах уруоктары, умнуллубат түгэннэри бэлэхтээтин!
Лилия МАРКОВА, Х кылаас, «Мичээр» медиа-киин, А.П. Илларионов аатынан Хайахсыт орто оскуолата, Чурапчы