Үлэ Геройа Михаил Николаевич Готовцев аатын сүгэр Танда орто оскуолатыгар, саҥа 2026-2027 үөрэх дьылын маҥнайгы чуораана чугдаарда.
Быйылгы үөрэх дьылыгар оскуолабытыгар 64 оҕо үөрэниэ, онтон оскуола боруогун аан маҥнай атыллаан бастакы кылааска икки үөрэнээччи киирдэ. Кинилэри билии-көрүү дойдутугар сирдээччинэн, бастакы учууталларынан оскуолабытыгар саҥа үлэлии кэлбит Евдокия Викторовна Бурцева ананна.
2026-2027 үөрэх дьылын үөрүүлээх аһыллыытыгар Арассыыйабыт Федерациятын былааҕын оскуолабыт дириэктэрэ Константин Георгиевич Готовцев, быйыл оскуоланы бүтэрэр выпускник Туйаара Мамонтова, оскуола боруогун аан маҥнай атыллыыр үөрэнээччилэр Вера Вензель, Петя Черноградскай көтөхтүлэр.
Билии күнүнэн эҕэрдэ тыллары оскуолабыт дириэктэрэ Константин Георгиевич, Байаҕантай нэһилиэгин баһылыга Савва Иванович Егоров, Саха Республикатын үөрэҕэриитин туйгуна, РФ үөрэҕириитин бочуоттаах үлэһитэ, Саха республикатын үөрэҕириитин үтүөлээх үлэһитэ Надежда Михайловна Егорова, Уус Алдан улууһун кырдьаҕастарын сэбиэтин бэрэсээдэтэлэ Иван Иванович Колодезников, «Кэнчээри» оҕо уһуйаанын коллективын аатыттан оҕолор иитээччилэрэ Саргылаана Алексеевна Готовцева эҕэрдэлээтилэр. Кинилэр үөрэнээччилэргэ, учууталларга ситиһиилэри, саҥа арыйыылары баҕардылар, маҥнайгы кылаас үөрэнээччилэригэр бэлэхтэрин туттардылар.
Быйыл оскуолабытыгар саҥа үлэлии кэлбит математика учууталыгар Марианна Гаврильевнаҕа, маҥнайгы кылаас учууталыгар Евдокия Викторовнаҕа, биология учууталыгар Игорь Алексеевичка, биһиги оскуолабытыгар өр сылларга директорынан үлэлээбит Надежда Михайловна: «Саҥа учууталлар Танда орто оскуолатын хайаан да таптыыргытыгар уонна оҕолоргутун билиигэ-көрүүгэ сирдииргитигэр, бу Байаҕантай нэһилиэгин, мин үлэлээн ааспыт дойдум диэн куруук өйдүү-саныы сылдьаргытыгар”, – диэн баҕа санаатын эттэ. Ону таһынан быйылгы үөрэх дьыла биһиги оскуолабытыгар уратылааҕын бэлиэтээтэ. Ол курдук 2027 сылга оскуолабыт 135 сааһын туолар. Онон бары үөрэнээччилэргэ, быйылгы үөрэх дьылын түмүктүүр, олох киэн аартыгар үктэнэр выпускниктарга алгыс тылын эттэ.
Саҥа үөрэх дьыла бука барыбытыгар ситиһиини, кыайыыны-хотууну эрэ аҕаллын.
Айыллыына ГОТОВЦЕВА, Х кылаас, М.Н. Готовцев аатынан Танда орто оскуолата, Уус Алдан
Туйаара МАМОНТОВА хаартыскалара, XI кылаас