Бэс ыйын 30 күнүгэр Дьокуускай куорат Н.Д. Неустроев аатынан библиотекатыгар Харбалаахтан силис тардар, саҥа үүнэн иһэр эдэр талааннаах оҕобут, Айыы Кыһатын үөрэнээччитэ, Айыына Тарасова бастакы анал быыстапката буолла.
Айыына Валентина Викторовна, Егор Кузьмич Блахировтар сиэннэрэ буолар. Тэрээһини бэйэбит кыыспыт, быйыл «Сыл бастыҥ библиотекара» үрдүк ааты сүкпүт Мария Васильевна Арылахова-Беленкова бэркэ салайан ыытта.
Быыстапкаҕа Айыына уруһуйдара, туойтан араас оҥоһуктара турдулар. Айыына норуоттар икки ардыларынааҕы, 5 бүтүн Арассыыйатааҕы, 3 өрөспүүбүлүкэтээҕи күөн күрэстэр лауреаттара буолара — кини кэскиллээх талааннааҕын кэрэһэлиир.
Оҕо талаана арылларыгар учуутал оруола сүҥкэн. Алын сүһүөх кылаастарга Айыынаны Екатерина Николаевна Тарская үөрэппитэ. Керамическай кылааска Мария Николаевна Гуляева — Туойаҕа дьарыктанан, сыл аайы арыллан испит.
Быйыл бу кылааһын туйгуннук түмүктээбитинэн уһуйааччыта киэн туттар үөрэнээччитин быыстапкатын тэрийбитэ олус үөрүүлээх!
Оҕобут өссө үүнэн-сайдан истин диэн алгыс баһын сыалыыбыт!
Валентина Кривошапкина, Харбалаах, Таатта