Аныгы уопсастыбаҕа волонтерскай хамсааһын оҕону иитиигэ-үөрэтиигэ улахан суолталаах. Кини оскуола оҕолоругар эппиэтинэһи, дьоҥҥо болҕомтону уонна иэйиилээх буолууну сайыннарарга көмөлөһөр. Саха гимназиятыгар добровольческай үлэ үөрэнээччилэри, педагогтары уонна төрөппүттэри түмэр, уопсай иитэр система сорҕото буолар.
Саха гимназиятыгар волонтерскай хамсааһын салайааччытынан нуучча тылын уонна литературатын учуутала, кылаас салайааччыта Марианна Васильевна Ордахова буолар. «Волонтерскай үлэ — туспа хайысха буолбатах, иитэр үлэ сорҕото. Аһаҕас буолуу, үтүө дьыала уонна атын дьон олохторугар кыттыы оҕолорго эппиэтинэһи, иэйиини, үчүгэйи уонна куһаҕаны өйдөөһүнү үөскэтэр. Улахан дьон бэйэлэрэ холобур көрдөрөллөрө олус улахан суолталаах», — диэн Марианна Васильевна бэлиэтиир».
Учуутал идеялара үөрэнээччилэр дьыалаларыгар чопчу көстөр. Волонтерскай хамсааһын биир актыыбынай кыттыылааҕа 9 «б» кылаас үөрэнээччитэ Аня Кириллина буолар. Кини анал байыаннай дьайыы кыттыылаахтарыгар аккырыыккалары оҥорон саҕалаабыта, үлэлэрин уратыта — волонтерстваны уонна национальнай культураны холбооһун. Аккырыыккаларга Аня олонхо геройдарын уобарастарын туһанар, кинилэр нөҥүө ытыктабылы, махталы уонна төрөөбүт сирин кытта сибээһи тиэрдэр.Аня волонтерскай үлэтин алтыс кылаастан саҕалаабыт. Кини үлэтигэр «Туллук» волонтерскай хамсааһын эмблематын оҥоруу ураты миэстэни ылар. Логотип төрдүгэр туллук — эрэли уонна үчүгэйи көрдөрөр көтөр уобараһа сытар. Композицияҕа эмиэ Саха Өрөспүүбүлүкэтин былааҕын элэмиэннэрэ туттулуннулар, оттон эргимтэ биир санааланыыны уонна иннин диэки хамсааһыны көрдөрөр. «Эмблеманы оҥорууга эрэл, үтүө, биир санааланыы идеятын тиэрдиэхпин баҕарбытым»!, — диэн Аня бэлиэтиир.
«Туллук» волонтердара араас акциялары ыыталлар: истиҥ иһирэх тыллаах суруктар, оҕо сылаас илиитинэн оҥоһуллубут харысхаллар. Ону таһынан төрөппүттэр, учууталлар маскировачнай ситимнэри өрүүгэ кыталлар.
Волонтерскай хамсааһын биир сүрүн салаата — анал байыаннай дьайыыга сылдьар выпускниктарын кытта сибээһи тутуһар. Кинилэр отпускаларын кэмигэр оскуолаларыгар сылдьан оҕолору кытта көрсүһэллэр, хорсун быһыы уруогун ыыталлар. Маннык көрсүһүүлэр оскуола оҕолоругар утумнааһын, өй-санаа, эппиэтинэс суолтатын билэргэ көмөлөһөллөр. Оннук биир көрсүһүүгэ оскуола выпускниктара Айаал Лыткинҥа, Байдам Кузьминовка, Марианна Васильевна үөрэнээччилэр суруктарынөйөбүл, махтал тылларын кытта туттарбыта.
«Туллук» волонтерскай хамсааһыны биир сүрүннээччинэн уонна көҕүлээччинэн гимназия дириэктэрэ Валентина Васильевна Софронеева буолар. Кини оскуола оҕолорун иитиигэ-үөрэтиигэ тус холобур суолтатын тоһоҕолоон бэлиэтиир: «Саамай сүрүнэ — бэйэҕиттэн саҕалааһын. Оҕолорбутугар үтүөнү, эппиэтинэһи иитиэхпитин баҕарар буоллахпытына, ону бэйэбит холобурбутунан көрдөрүөхтээхпит»
Түмүктээн эттэххэ, саха гимназиятыгар үлэлиир «Туллук» — үөрэнээччини, учууталы уонна төрөппүтү биир сыалга-сорукка түмэр волонтерскай хамсааһын буоларын көрдөрөр.
Сардаана Данилова, XI кылаас, «Үктэл» пост, Саха гимназията, Дьокуускай.