Бүгүн, муус устар 10 күнүгэр, Дьокуускай куоракка ХИФУ естественнай наукалар факультеттарын корпустарыгар, «Точка кипения» саалатыгар Саха Өрөспүүбүлүкэтигэр биллэриллибит олоҥхо үһүс 10 сыл былаанын торумнааһын тэрээһинэ стратегическай сессия хабааннаах ыытылынна.
Бу күн араас идэлээх култуура, үөрэх, спорт, урбаан, бэчээт эйгэтин үлэһиттэрин түмтэ. Кыттааччылар сүрүн соруктарынан төрүт култуураҕа, олоҥхо эйгэтигэр кэлэр 10 сылга ыытыллыахтаах тэрээһиннэр бырайыактарын барылларын, олоххо киириилэрин хамаанданан толкуйдааһын, көрүү, санаа үллэстиитэ буолла.
Тэрээһини Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Местников тыл этиитинэн саҕалаата:
Олоҥхо — биһиги үгэспит уонна култуурабыт ис баайа. 2006 сыллаахха Аан дойду муҥутуур баайа диэн ЮНЕСКО испииһэгэр киирбитэ. Ол онтон 20 сыл ааста. Бу 20 сыл устата балачча киэҥ үлэ-хамнас ыытылынна. Билигин олоҥхону эдэр ыччакка тарҕатыытыгар институттар, тыйаатырдар, үөрэх кыһалара баар буоллулар, үөрэтэр буоллулар уонна, саамай сүрүнэ, олоҥхоһуттар баар буоллулар. Бүгүҥҥү көрсүһүүгэ, бастакытынан, туох үлэлэр барбыттарын, туох ситиһиллибитин уонна туох кыайтарбатаҕын дьүүллэһиэхпит. Иккиһинэн, кэлэр 10 сылга туох сыалы-соругу туруорабытый диэн ыйытыынан сиэттэриэхтээхпит.
Тэрээһин сүрүн ыалдьытынан СӨ култуураҕа уонна духуобунай сайдыыга миниистирэ Афанасий Иванович Ноев буолла:
Биһиги элбэх омуктаах республикаҕа, дойдуга олоробут. Онон биһиги аҕыйах ахсааннаах хотугу норуоттарбыт эпостарын хайаатар даҕаны сайдыытын тосхоллорун эмиэ тобулуохтаахпыт. Билигин Олоҥхо тыйаатырын тэрийэммит үрдүкү ускуустуба биир көрүҥүн быһыытынан төрүттээн, онтукайбытын сайыннаран, Арассыыйа таһымыгар көрдөрө сылдьабыт.
Стратегическай сессияҕа кэлбит дьон, култуура уонна ускуустуба эйгэтин үлэһиттэрэ уопсайа 8 хамаандаҕа хайдан, биир чаастаах мэйии үлэтэ ыытылынна. Сүрүн баайбытын, олоҥхобутун, олох араас эйгэлэригэр хайдах киллэрэр, сөпкө туһанар, сайыннарар уонна тарҕатар туһунан олус элбэх этиилэр иһилиннилэр, олоххо киирэллэрин туруорастылар. Успуорт, урбаан, оҥоһуу өй, доруобуйа курдук хайысхаларга олоҥхону киллэриэххэ, туһаныахха уонна аныгылыы көрүөххэ сөбүн туһунан дакаастаатылар. Ол түмүгүнэн, этиллибит идиэйэлэр уонна этиилэр олоххо киирэллэрин туһугар, бу суруллубут былааннар уонна бырайыактар култуура министиэристибэтигэр хомуллан тиийэрин туһунан эттилэр.
Олоҥхо — саха норуотун олоҕун-дьаһаҕын, култууратын, тылын-өһүн — барытын илдьэ сылдьар сүдү баайбыт. Маны биһиги кэлэр көлүөнэ ыччакка, кэлэр кэнчээригэ хаалларар уонна тарҕатар улахан соруктаахпыт. Ол туһугар маннык тэрээһиннэр уонна күүстээх үлэлэр ыытыллаллара олус сөптөөх уонна тоҕоостоох диэн сыаналыыбыт. Бүгүҥҥү тэрээһиҥҥэ этиллибит санаалар уонна этиилэр хайаатар даҕаны олоххо киирэллэрин баҕарабыт.