Кулун тутар 20 күнүгэр Чурапчытааҕы физкультура уонна спорт институтун базатыгар «Зарница 2.0» байыаннай-спортивнай оонньуу улуустааҕы түһүмэҕэ буолан ааста. Эдэр ыччакка патриотическай санааны күүһүрдэр күрэх үрдүк таһымнаахтык ааста.
Оонньууга Чурапчы улууһун 7 оскуолатыттан барыта 7 хамаанда кыттыыны ылла: Д.П. Коркин аатынан Чурапчы улууһун интернат оскуолата; С.К. Макаров аатынан Чурапчы гимназията; И.М. Павлов аатынан Чурапчы орто оскуолата; С.А. Новгородов аатынан Чурапчы орто оскуолата; Г.П. Башарин аатынан Сылаҥ орто оскуолата; В.С. Соловьев-Болот Боотур аатынан Хатылы орто оскуолата; Р.И. Константинов аатынан Амма орто оскуолата.
Кинилэр биирдиилээн уонна хамаанданан бастыыр иһин күрэхтэргэ сатабылларын көрдөрдүлэр. Олус интэриэһинэй түһүмэхтэр аастылар. Холобур, быраастар (медиктар) түһүмэхтэригэр тестовай сорудах толороллор. Анал балаһаларга (зоналарга) быраас оҥорор үлэтин сиһилии быһааран суруйаллар.
Кыһыл балаһа саамай ыарахан уонна кутталлаах, ол эбэтэр онно сыыллан киирэн, эчэйбит киһини быыһыыр дьайыы оҥоруохтааххын уонна араҕас балаһаҕа сыыллан тахсаҕын. Араҕас балаһа – орто кутталлаах, манна номнуо олороҥҥун ыарыһаҕы толору көрөҕүн. Онтон от күөх балаһаҕа соһон таһаараҕын. Бу куттала суох балаһа. Манна туруоххун сөп, киһини өссө толору көрөҕүн.
Оҕолор ордук тактическай оонньууну сэҥээрбиттэр. Бу көрүҥҥэ ураты тактиканы туһанан кыайыылааҕынан интернат-оскуола хамаандата буолла.
Бары хамаандалар үчүгэйдик кытыннылар. Хас биирдии оҕо хамаандатын туһугар олус кыһаллан, эппиэтинэстээхтик сыһыаннаһан, бэйэлэрин хамаанда быһыытынан үлэлэрин көрдөрөн, түһүмэхтэр түмүктэринэн дьүүллүүр сүбэ кыайыылаахтары быһаарда: 1 миэстэ – Д.П. Коркин аатынан Чурапчы улууһун интернат-оскуолата; 2 миэстэ – С.К. Макаров аатынан Чурапчы гимназията; 3 миэстэ — И.М. Павлов аатынан Чурапчы орто оскуолата.
Мин санаабар, олус таһаарыылаах күрэх буолан ааста, «Зарница 2.0» патриотическай күрэх эдэр ыччат сайдыытыгар улахан оруолу оонньууругар саарбахтаабаппын. Хас биирдии кыттыбыт оҕо, хамаанда чилиэнэ, дойдуларыгар бэриниилээх буолуу санаалара күүһүрэн, дьон-сэргэ туһугар үлэлиир-хамсыыр, сайдар туһугар дьулуһуохтара диэн эрэнэбин.
Винея БАРАШКОВА, Х кылаас
Видео, монтаж, ыытааччы Кристина Михайлова,
«Тумус кыһа» медиа-киин, С.К. Макаров аатынан Чурапчы гимназията