Кулун тутар 12 күнүгэр биир умнуллубат бэлиэ түгэн буолан ааста. Бу күн биһиги, эдэр кэрэспэндьиэннэр, улууспут баһылыгын Василий Петрович Алексеевы уонна анал байыаннай дьайыы кыттыылаахтара, Арассыыйа Дьоруойдара Алексей Рафаэлович Петровы, Радомир Дмитриевич Максимовы кытта көрүстүбүт.
Улуус баһылыга Василий Петрович Алексеев патриотическай иитии суолтатын, дойдуга бэриниилээх буолуу туһунан, биһиги Дьоруойдарбыт олохторун суола уонна хорсун быһыылара хас биирдии ыччакка үтүө холобур буоларын бэлиэтээтэ. Арассыыйа Дьоруойдара Алексей Рафаэлович уонна Радомир Дмитриевич бэйэлэрин олохторун, сулууспаларын уонна эр санаа, доҕордоһуу туһунан кэпсээтилэр. Юнкордар Дьоруойдарга интэриэһиргиир ыйытыыларын биэрдилэр.
Оҕо сылдьан тугунан дьарыктаммыккытый, эдэр көлүөнэҕэ, ыччакка туох сүбэни биэриэххитин сөбүй диэн ыйытыыларга Алексей Рафаэлович: «Кыра сылдьан биһиэхэ төлөпүөн, интернет суох этэ. Ол иһин, таһырдьа тахсан доҕотторбутун кытта бииргэ оонньуур этибит, сүүрэн-көтөн, мэниктээн. Оскуолаҕа сөбүлүүр уруогум физика этэ. Саҥа киирэр технологиялары туһанан дойдубутун сайыннарыҥ», – хоруйдаата.
Онтон Радомир Дмитриевич: «Кыра сылдьан наһаа мэник этим. Ол да буоллар, кыра сылдьан ыллыыр этим. Эбэм үөрэтэрэ. Эбээ, эһээ оҕотобун. Кыра сылдьан, таһырдьа түүн хараҥаҕа тахсан эккирэтииһилээх оонньуурбут. Спорт өттүнэн күүскэ дьарыктаныҥ, төрөөбүт дьиэҕитин, сиргитин-уоккутун умнумаҥ, улуустаргытын сайыннарыҥ. Толкуйгутун араас өттүнэн сайыннарыҥ», – диэн хоруйдаата.
Бу көрсүһүү биһиэхэ, умнуллубат өйдөбүлү хаалларда. Дьиҥнээх олоххо баар Дьоруойдары кытта сирэй көрсөн кэпсэтии – улахан чиэс уонна эппиэтинэс. Кинилэр курдук күүстээх санаалаах, дойдуга бэриниилээх дьон баар буоланнар, биһиги эйэлээх халлаан анныгар үөрэнэбит, айабыт-тутабыт.
Бу көрсүһүү кэнниттэн маннык түмүк санааҕа кэллим: Дьоруой буолар диэн анал идэ буолбакка, бу бэйэ норуотугар, дойдуга таптал, эппиэтинэстээх буолуу.
Күндүүнэ ЕГОРОВА, VIII кылаас,
М.Н. Готовцев аатынан Танда орто оскуолата, Уус Алдан
Туйаара Мамонтова видеота, Х кылаас