Олунньу 18 күнүгэр Лөгөй лиссиэй-интэринээтигэр XXVII улуустааҕы, VI өрөспүүбүлүкэтээҕи Татьяна Егоровна Дуткина аатынан ыытыллар математика олимпиадата буолан ааста. Улууспут 19 оскуолатыттан 202 оҕо кэлэн кыттыыны ылла. Ону таһынан, Өрөспүүбүлүкэ араас муннуктарыттан Нам, Мэңэ-Хаңалас, Горнай, Бүлүү, Үөһээ Бүлүү, Чурапчы, Хаңалас, Ньурба улуустарыттан уонна Дьокуускай куораттан барыта 27 оскуолаттан 900-кэ оҕо кэтэхтэн кытынна. Быйылгы олимпиадаҕа барыта холбоон 46 оскуолаттан 1100-тэн тахса оҕо кыттыыны ылла.
Бу олимпиада XXVII төгүлүн Российскай Федерация үтүөлээх учуутала, Үлэ Албан аата уордьан толору кавалера, Д.И. Васильев — Очинскай бириэмийэтин лауреата, «Дети Саха-Азия» Аан дойдутааҕы фонда стипендиата Татьяна Егоровна Дуткина аатынан ыытыллар. Математика курдук уустук предмекка оҕолор бэйэлэрин билиилэрин тургуттулар.
Олимпиада арыллыытыгар Лөгөй лиссиэй-интэринээт дириэктэрэ Михаил Петрович Пухов, Өрөспүүбүлүкэтээҕи лиссиэй-интэринээт учуутала Т.Е.Дуткина коллегата, сылын аайы дьүүллүүр сүбэ бэрэссэдээтэлэ Михаил Николаевич Данилов эҕэрдэ тылларын эттилэр, кыттааччыларга ситиһиини баҕардылар.
Дьүүллүүр сүбэнэн Хотугулуу Илиңңи Федеральнай университет Математика уонна информатика хайысхатын устудьуоннара уонна дьүллүүр сүбэ салайааччыта М.Н.Данилов үлэлээтилэр.
Олимпиада кэнниттэн оҕолор оскуолаларынан арахсан 15 станциялаах оонньууга кыттыыны ыллылар. Хамаанданаан оонньууга кыайыылааҕынан таҕыста Мүрүтээҕи «Уолан» гимназия бастакы нүөмэрдээх хамаандата.
Быйылгы олимпиадаҕа «Уолан» гимназия, Мүрү 1 нүөмэрдээх оскуолата уонна Лөгөй лиссиэй интэринээтин үөрэнээччилэрэ үрдүк көрдөрүүлэннилэр.
Биһиги лиссиэйбититтэн 4-с кылаас үөрэнээччитэ Бурнашев Ваня 1 миэстэни, Бурнашев Гриша 3 миэстэни ыланнар барыбытын үөртүлэр. 8-с кылаас үөрэнээччитэ Петров Семен 2 миэстэни ылары ситистэ, Маглысова Марина 3-с бочуоттаах миэстэҕэ тигистэ. Миэстэлэспит оҕолорго, учууталларыгар эҕэрдэ!
Математика курдук уустук предметы сөбүлүүр, бүгүңңү уустук сорудахтаах олимпиада кыайыылаахтарын уонна кинилэр учууталларын эҕэрдэлиибит. Т.Е. Дуткина аатынан сылын аайы буолар олимпиадаҕа эһиил күүтэбит!
Дайна Куприянова, Лөгөй лиссиэй-интэринээт «LegMedia” эдкора
Фото: Николай Малышев, Родион Перевалов