Түөрт дьоруойдаах Байаҕантай нэһилиэгэр биһиги оскуолабыт Аҕа дойду Дьоруойдарын күнүн үөрүүлээхтик бэлиэтээтэ. Тэрээһини Улуу Кыайыы 80 сылын кытта ситимнээн ыыттыбыт.
Танда орто оскуолатын үөрэнээччилэрэ киэн туттар дьоруойдарбытыгар анаммыт хоһооннору ааҕан, кинилэр ааттарын-суолларын үйэтитэргэ ыҥыран тураннар, тэрээһиммитин үөрүүлээхтик арыйдылар.
Сүрүн чааһыгар Уус Алдан улууһуттан төрүттээх дьоруойдар олохторун уонна хорсун быһыыларын туһунан кэпсиир «Хорсун буолуу уруога» буолла. Оҕолор улууспут биллиилээх дьонун туһунан саҥа, интэриэһинэй чахчылары биллилэр, кинилэр холобурдарыгар олоҕуран дойдуга бэриниилээх буолуу туһунан толкуйдаатылар.
Ону таһынан И.П. Готовцев аатынан Тандатааҕы историко-краеведческай музей специалиһа Матрена Петровна оҕолорго историческай экспонаттары көрдөрдө. Оҕолор бу экспонаттары көрөн дойду историятын чугастык ылыммыттара саарбаҕа суох. Сэрии кэминээҕи маллары, докумуоннары, хаартыскалары көрдүбүт.
Күн иккис аҥаарыгар үөрэнээччилэр Улуу Кыайыы тиэмэтигэр квест-оонньууга кытынныбыт. Ыаллыы сытар Тиит Арыыттан оҕолор кэлэннэр, уопсайа биэс хамаандаҕа арахсаммыт оонньоотубут. Оонньуу араас түһүмэхтэригэр оҕолор билиигэ, сатабылга уонна биир санааланыыга күрэхстэстилэр.
Бу тэрээһин ыччаты төрөөбүт дойдуларын таптыырга, историяҕа ытыктабыллаахтык сыһыаннаһарга уонна дьоруойдарбыт үтүө ааттарын үйэтитэр, иитэр улахан суолталаах. Ону таһынан оҕо өйүгэр-санаатыгар дириҥ суолу-ииһи хааллараллар.
Күндүүнэ ЕГОРОВА, VIII кылаас,
М.Н. Готовцев аатынан Танда орто оскуолата, Уус Алдан
Туйаара Мамонтова хаартыскалара, X кылаас