Саха уус-уран литэрэтиирэтин төрүттээбит чулуу киһибит А.Е. Кулаковскай – Өксөкүлээх Өлөксөй «Оттоку олук алгыһа» диэн айымньытыгар кэлэр кэнчээри ыччакка алгыһын анаабыта киһини толкуйдатар. Араас омуктары кытары атастыы-доҕордуу буолуҥ диэн суруйбут. Чахчы даҕаны, охсуһа-этиһэ сырыттахха туох сайдыы кэлиэҕэй. Бу кини сахатын омугун инникитин толкуйдаан маннык суруйбут эбит. Өскөтүн кини быстах санаалаах суруйбута буоллар, атын омуктары кытта бодоруһумаҥ, бэйэҕит-бэйэҕитигэр олоруҥ диэҕин сөп этэ. Ол эрээри биир сиргэ олорортон сайдыы барбатын өйдөөн бу айымньытын айбыт.
Маны таһынан олус элбэҕи сүбэлээбит. Сүөһүнү-сылгыны эспэккэ, элбэтэрбитин, хаҥатарбытын баҕарбыт. Ол эрээри билигин сүөһүнү эһии олус элбээтэ. Бэйэбит иҥэмтиэлээх эппитин-аспытын сиэбэккэбит, тастан киирбит араас астары сиибит. Оннук астар кэлиэхтэриттэн элбэх ыарыы баар буолла. Өксөкүлээх Өлөксөй ону өйдөөн сүөһүнү-сылгыны иитиҥ диэн ыҥырар. Саха омугун инникитэ аһыыр аспытыттан кытары олус тутулуктаах билбит. Омук буолан сайдыҥ, куһаҕан санааны суох оҥоруҥ, или-эйэни өрө тутуҥ диэн этэр. Ол аата кини мындыр, өйдөөх, барытыгар табыгастаах тахсыыны булар дьон, омук буоларбытыгар баҕарбыт. Бэйэ-бэйэҕитин харыстааҥ, ытыктааҥ, көмөлөмүһэ сылдьыҥ диэн алҕаабыт. Чахчы, биһиги кыра ахсааннаах омукпут. Бэйэ-бэйэбитин харыстаабатахпытына, биһигини ким даҕаны харыстыа суоҕа. Омук быһыытынан хааларбытыгар ол олус улахан оруолу оонньуур. Билиҥҥи кэмҥэ олус сөптөөх тылларынан алгыһын хоһуйбут эбит сөхтүм. Биһиги кини «Ойуун түүлэ» диэн саха норуотун дьоно бары билэр айымньытын аахпыппыт. Онно кини үйэни уҥуордаан инникини өтө көрөр. Ол айымньыны ааҕарбар кини ураты айдарыылааҕын номнуо өйдөөбүтүм. Билигин «Оттоку олус алгыһа» диэн айымньытын ааҕан баран ол санаабын төгүл өссө бигэргэттим.
Бары улуу убайбыт айымньытын ааҕа иликтэр ааҕыҥ, аахпыттар кини туох диэн эппитин куруук өйдүү сылдьыҥ диэн ыҥырабын.
Арина ЗАБОРОВСКАЯ, XI кылаас
«АЛиК» медиа-киин
Академик Л.В. Киренскэй аатынан Амматааҕы лиссиэй