«Айыы кыһата» национальнай гимназия, саха ыалдьытымсах үгэһинэн, «Үрүҥ хаар алгыһа» аан дойдутааҕы бэстибээл кыттааччыларын алаадьынан айах тутан көрүстэ.
Дириэктэрбит Лидия Петровна Шамаева иитэр-үөрэтэр үлэ ураты үгэһин ыраахтан кэлбит ыалдьыттарга билиһиннэрдэ. Төрдү-ууһу билии, ытыктааһын оҕо аал луук мастыы сириэдийэн сайдан тахсарыгар төһүү күүс буоларын кэпсээтэ. Оскуола хаһыатын сырдатар үлэ биир хайысхатын быһыытынан бэлиэтээтэ. Дириэктэри иитэр үлэҕэ солбуйааччы Наталья Николаевна Емельянова сахалыы төрүт дьарык гимназияҕа хайдах тэриллэрин, эбээлэр түмсүүлэрин, аҕалар сүбэлэрин үлэлэринэн холобурдаан сырдатта. Ону таһынан үөрэнээччилэр оскуолаларын туһунан ыалдьыттарга билиһиннэрдилэр. Көрсүһүү биир ураты түгэнинэн – ыалдьыттар холумтан олордуутун сиэрин-туомун көрдүлэр. Тоҥолохтон ылсан оҕолордуун бииргэ оһуохайдаатылар. Бу туһунан ыалдьыппыт Николай Васильев-Харыйалаах уола санаатын үллэһиннэ: «Оскуола, аата да этэринэн, саха итэҕэлин илдьэ сылдьара олус кэрэхсэбиллээх. Оҕолор сиэрдээх дьон буолалларыгар бу хайысха төһүү буолар».
Салгыы ыалдьыттар оҕолору кытта көрүстүлэр, истиҥ кэпсэтиини тэрийдилэр. Кытай сириттэн сылдьар суруйааччы Ван Цзяньчжао бэйэтин хоһоонун төрөөбүт тылынан ааҕан иһитиннэрдэ. Саха сирэ төһө да тымныытын иһин, дьоно-сэргэтэ ураты сылаас сыһыаннаахтарын сөҕөн бэлиэтээтэ.
“Дьулуруйар Ньургун Боотур” олоҥхону казах тылыгар тылбаастыы сылдьар суруйааччы Улугбек Есдаулет оскуолаҕа үөрэнэ сылдьан, аан маҥнайгы хоһооннорун хайдах суруйан саҕалаабытын сэһэргээтэ. Олоҥхону тылбаастыыр үлэ уратытын үллэһиннэ. Биир дойдулаахпыт Николай Васильев-Харыйалаах уола уонна эдэр поэт Римма Крылова хоһооннорун ааҕан иһитиннэрдилэр. Бу киэһэ өссө биир уратыта – суруйааччы учууталбыт Александра Лукинична Матвеева-Долгура хоһооннору аахта. Көрсүһүүнү поэт, Арасыыйа суруйааччыларын сойууһун чилиэнэ Зинаида Архипова иилээн-саҕалаан ыытта, саҥа хомуурунньугар киирбит хоһооннорун аахпытын олус сэҥээрэ иһиттибит. Кыра кылаас оҕолоро төрөөбүт сахабыт тылынан хомоҕой хоһооннорун бэлэхтээтилэр.
Оҕолор бу тэрээһин ураты сылаас эйгэлээҕин бэлиэтээтилэр. Сонун тэрээһини олус сэҥээрэн, элбэҕи иҥэринэн тарҕастылар. Поэттары кытта өйдөбүнньүк хаартыскаҕа түстүлэр. Поэзия сырдык эйгэтин бэлэхтээбит ыалдьыттарбытыгар барҕа махтал.
Айыына Герасимова 10 «Б» кылаас, Виктория Григорьева 11 «А» кылаас, «Айыы Кыһата» национальнай гимназия, Дьокуускай