Бу дьиҥнээх сонун, киһини долгутар, хаһан да умнуллубат история. Балаҕан ыйын 19 күнэ — саха норуотун ынырык дьылҕата, ол эрэн кинилэр тулуурдара уонна модун санаалара, киэн туттар, ыар да буоллар, умнуллубат күммүт.
Бу күн Халыҥ Хадаарбытыгар Аҕа дойду Улуу сэриитин кэмигэр Чурапчы оройуонун күүс өттүнэн хоту көһөрүллүүтүн ыар кэмин санаан ааһар кутурҕан миитинэ буолла. Ол кэмҥэ дьоннорбут төһө эрэ эрэйдэммиттэрин, хайдах тулуйбуттарын сүрэхпитигэр иҥэринэн иһиттибит. Бу күн биһиги, ыччаттар, Аҕа дойдубут туһугар олохторун харыстаабатах, ыарахан олоҕу тулуйбут ытык дьоммутун умнубаппыт. Кинилэр – биһиги историябыт тыыннаах кинигэлэрэ, киэн туттуубут.
Биһиги Халыҥ Хадаарбытыгар ол кэмнэри этэҥҥэ аһарбыт, бүгүн биһигини кытта сылдьар үс ытык кырдьаҕаспытыгар сүгүрүйэбит. Дьиҥнээх хорсун дьон! Кинилэр бааллара – биһиэхэ уостубат күүс-уох уонна эрэл.
Миитин кэмигэр, көһөрүллүүгэ кыттыбыт, ытык кырдьаҕас Дмитрий Константинович Лукин олус дириҥ ахтыытын оҥордо. Кини кэпсээнин истэн, ол ынырык кэмҥэ хайдах олорбуттарын, кыыһар тымныыны, аччыктааһыны хайдах тулуйбуттарын, саха дьоно хайдах биир сомоҕо буолан, бэйэ-бэйэлэрин өйөһөн, эрэллэрин сүтэрбэккэ олорбуттарын харахпытынан көрбүт курдук буоллубут. Бу – оҕолорго, ыччаттарга дьиҥнээх патриотизм, тулуур холобура.
Маны сэргэ биһиги таптыыр, ытыктыыр Александра Васильевна Софроновабыт кэнчээри ыччакка анаан, инники кэскилбитин, Аҕа дойдубут күүһүрүүтүн туһугар алгыс тылын анаата. Кини тыла-өһө сүрэхпэр киирэн, төрөөбүт дойдубар тапталы, кинини харыстыыр баҕаны өссө күүһүртэ. Саха тыла, алгыһа дьиҥнээх күүс!
Бу сүрэҕи-быары хамсатар тэрээһиҥҥэ, биһиги оскуолабыт элбэх оҕолоох ийэтэ Лия Максимовна Лукина оскуолабыт үөрэнээччилэрин кытта толорбут ырыата, айымньыта сонун, истиҥ буолла. Кинилэр толоруулара ыар кэмнэри, саха омук күүһүн, дьулуурун өссө үчүгэйдик арыйда. Бу ырыа, кэрэ айымньы нөҥүө, историябыт ыар да буоллар, чиэстээх кэрчигин өйдөтөн, сүрэхпэр төрөөбүт дойдубар тапталы, киэн туттууну иҥэрдэ.
Эһиги чөл буолаҥҥыт, уһун үйэлэнин, ытык-мааны бэтэрээннэрбит! Эһиги уостубат күүскүт-уоххут, үйэлээх үөрэххит биһиэхэ мэлдьи тирэх буолуоҕа. Саха норуота күүстээх! Россия дойдутун биир күүстээх омуга буоларбытынан, эһиги дьылҕаҕытынан киэн туттабыт!
Аристарх ЛУКИН, Х кылаас, С.Д. Флегонтов аатынан Хадаар орто оскуолата, Чурапчы
https://t.me/keskil_media2020/19114В.С. Яковлева видеота
А.А. Федорова хаартыската