Балаҕан ыйын 19 күнэ — Чурапчы көһөрүллүүтүн кэриэстэбилин күнэ. 1942 сыллаахха Чурапчы оройуонун 41 колхуоһа хоту улуустарга күүс өттүнэн көһөрүллүбүтэ. Барыта 5318 киһи, 1837 дьиэ кэргэн Кэбээйи, Эдьигээн, Булун оройуоннарыгар көһөрүллүбүттэриттэн быстар аҥаардара эрэ дойдуларыгар эргиллибитэ.
Бу күн Чурапчы үрдүнэн суолталаах тэрээһиннэр ыытылыннылар. Көһөрүллүү кыттыылаахтарын оҕолоро, тыыл бэтэрээннэрэ Чурапчы гимназиятын үөрэнээччилэрин кытта көрүстүлэр, көһөрүллүүгэ түбэспит дьоннорун, хоту көһөрүллүү ыар кэмнэрин туһунан ахтан-санаан аастылар. Оҕолор болҕомтолоохтук олорон иһиттибит, ыйытыылары биэрдибит.
Ыалдьыттарбытыгар «Чурапчы туһунан өйдөбүл — көлүөнэ ситимэ» уус-уран дьүһүйүүнү билиһиннэрдибит, көһөрүллүү туһунан туруорууну көрдөрдүбүт.
Чурапчы дьоно төһө да ыарахан дьылҕалаах буоллаллар, бэйэлэрин ис санааларын, туох баар күүстэрин илиилэригэр ыланнар, үүнэн-сайдан, киһи-хара буолан, сайдыылаах олоххо үктэнэн, оҕо-уруу төрөтөн дьоллоох олох диэн тугун билбиттэрэ биһиэхэ холобур буолар. Кинилэр самнан, сүтэн-оһон хаалбакка, ситимнээбит олохторун биһиги, билиҥҥи ыччат эрэллээхтик салгыахтаахпыт диэн санаа үөскээтэ.
Көрсүһүү кыттыылаахтара билиҥҥи кэм оҕолоро көһөрүллүү туһунан чугастык ылыналларын көрөннөр долгуйдулар.
Кэскиллээх олох туһугар үлэһит, үөрэхтээх дьон буоларга кыһаллыҥ. Олоххо киэҥ, холку харыстабыллаах сыһыаннаах буолуҥ
диэн эппиттэрин оҕолор бары даҕаны өйбүтүгэр-санаабытыгар күүскэ иҥэриннибит дии саныыбын.
Ити курдук көһөрүллүү кыттыылаахтарын ыччаттарын кытта көрсүһүүттэн хас биирдиибит киэҥ толкуйдаах тарҕастыбыт.
София ГОГОЛЕВА, IX кылаас,
«Тумус кыһа» медиа-киин,
С.К. Макаров аатынан Чурапчы гимназията