От ыйын 7-12 күннэригэр Таатта улууһугар ыытыллар XXII «Манчаары оонньууларыгар» чэпчэки атлетикаҕа биһиги улууспутун чиэһин Каролина Слепцова көмүскүөҕэ.
Кини Мүрү 2 №-дээх орто оскуолатын IX кылааһын үөрэнээччитэ. Чэчпэки атлетиканан күүскэ ылсан дьарыктаммыта иккис сыла. Тренерэ ийэтэ Мария Егоровна Слепцова буолар. Мария Егоровна оҕолору алтыс сылын дьарыктыыр уопуттаах тренер.
Каролина быйыл IX кылааһы бүтэрэр олус эппиэтинэстээх кэмигэр бэйэтигэр күүстээх режимы туруорунан, 2007 сыллаах төрүөх уонна онтон кыра саастаах бөлөххө “Манчаары оонньууларыгар” кыттар путевканы ситистэ.
– Экзаменнарбын кытта күүстээх дьарыгы тэҥҥэ тутан, бэйэбэр ирдэбилбин күүһүрдэн, режиммын сөпкө аттаран бу путевканы ситистим. Онон XXII “Манчаары оонньууларыгар” кыттыы миэхэ олус сыаналаах, күндү. Бу улахан түһүлгэттэн ситиһиини, умнуллубат өйдөбүллэри күүтэбин, – диэн этэр Каролина Слепцова.
Чэпчэки атлетика кини олоҕор олус улахан суолталаах.
– Чэпчэки атлетика диэн миэхэ – чөл олох, чэгиэн доруобуйа, эт-хаан, өй-санаа өттүнэн сайдыы, сыаллаах-соруктаах буолуу, туруоруммут сыалбын ситиһии, – диэн кини санаатын үллэстэр.
Ытык Таатта сиригэр ыытыллар XXII «Манчаары оонньуулара» Каролина Слепцоваҕа соргулаах түһүлгэнэн буоллун!
Снежанна ГОТОВЦЕВА, XXII “Манчаары оонньууларын”
оҕо пресс киинин юнкора, М.Н. Готовцев аатынан Танда орто оскуолата, Уус Алдан