“Сосновый бор” лааҕырга “Кэскил” медиа оскуола смената олус үчүгэйдик ааста. “Саас” форум финальнай түһүмэҕэр хамаанданан үлэлээн, элбэх саҥаны биллим, атын оҕолор хайдах үлэлииллэрин көрдүм, кинилэри кытта билистим. Блогер Маргарита Лянге маастар-кылааһыгар сырыттым.
Олунньу 16 күнүн мин хаһан да умнуом суоҕа. Бу күн Москваҕа үөрэнэ барар путевканы туттум, аны сайын ыытыллар “Азия оҕолоро” спортивнай оонньууларын пресс киинигэр ыҥырылынным. Уонна саамай соһуйбутум, үөрбүтүм диэн биллиилээх тустуук, Ил Түмэн депутата Виктор Лебедев “Лучший создатель текста” диэн анал бирииһин – Galaxy S23 төлөпүөнү туттум!
Виктор Николаевич Лебедев – «Саханефтегазсбыт» генеральнай директора, Ил Түмэн Государственнай Мунньаҕын депутата. Көҥүл тустууга “Азия оҕолоро” III спортивнай оонньуулар чемпиона (2004 с.), Аан дойду икки төгүллээх чемпиона (2010, 2011 сс.), боруонса призёра (2009, 2015 сс.), Европа чемпионатын боруонса призёра (2010 с.), Россия алта төгүллээх чемпиона (2009, 2010, 2011, 2014, 2015, 2016), XXXI Олимпийскай оонньуулар кыттыылааҕа (Рио-де-Жанейро, Бразилия, 2016 с.), Россия спордун үтүөлээх маастара.
Мин медиа оскуолаҕа иккис сылбын үлэлиибин. Аан бастакыбын мас тардыһыытын күрэҕин сырдаппытым. Ол кэнниттэн суруйарбын, кадрга саҥарарбын сөбүлээн саҕалаабытым. Салайааччым Лидия Ивановна Лукина. Бастаан үлэлээн саҕалыырбытыгар иккиэ эрэ этибит: мин уонна Иванна Николаева. Сотору кэминэн медиа оскуола үлэтин атын оҕолор интэриэһиргээн, биһигини кытта тэҥҥэ үлэлэһэн саҕалаабыттара.
“Сосновый бор” лааҕырга “Кэскил” медиа оскуола сменатыгар иккиспин сырыттым. Мин манна кэлэммин сайдабын, саҥаны билэбин уонна ону барытын бэйэбэр туһанабын. Сахалыы үчүгэйдик суруйарга кыһаллабын. Виктор Лебедев бирииһин суруналыыс, суруйааччы Яна Ербулатовна Байгожаева туттарда. Кини: “Үчүгэй суруналыыс буолан тахсарга элбэҕи ааҕыахтааххын, бэйэҕэр ирдэбиллээх буолуохтааххын, элбэх быраабыланы билиэхтээххин, суобастаах буолуохтааххын”, – диэн эппитин өйдөөн хааллым.
“Саас” форум түмүгүнэн биһиги хамаанда кыайбатахпытын да иһин бары үөрэ-көтө сырыттыбыт. Москва куоракка айанныырбын, “Азия оҕолоро” оонньууларын долгуйа кэтэһэбин.
Өссө да сайдан иһиэм диэн бэйэбэр эрэнэбин.
Алёна КСЕНОФОНТОВА, VII кылаас, биэс бойобуой уордьаннаах
С.Д. Флегонтов аатынан Хадаар орто оскуолата, Чурапчы