Дьокуускай куоракка “Сосновый бор” лааҕырга “Кэскил” медиа оскуола юнкордара үлэбитин олунньу 21 күнүгэр түмүктээбиппит.
“Кэскил” оҕо бэчээтин кыһатын дириэктэрэ Ольга Ивановна Семенова сонуну тарҕатар, кэпсиир, суруйар юнкор оҕолор дьон кыһалҕатын өйдүүр үтүө санаалаах, уопсай дьыала туһугар кыһаллар буола улаатарбытыгар баҕа санаатын эппитэ уонна 8 медиа хамаандаҕа барыларыгар анал байыаннай дьайыыга кытта сылдьар байыастар дьиэ кэргэттэригэр көмө диэн бородуукта набордаах биирдии дьааһыгы туттарбыта.
Онон хас биирдии хамаанда иннигэр бу бородуукталаах дьааһыгы кимиэхэ биэрэри быһаарар сорук турбута. Мин бииргэ үлэлээбит 8-с хамаандам оҕолоро сүбэлэһэн-сүбэлэһэн бараммыт, анал байыаннай дьайыыларга сылдьар кэргэннээх ыаллы олорор билэр киһибэр, нуучча тылын уонна литературатын учууталыгар Анна Брониславовна Егороваҕа туттарабыт диэн биир санааҕа кэлбиппит. Доҕотторум миэхэ эрэммиттэрэ улахан эппиэтинэс этэ.
Бүгүн дойдубар Уолбаҕа Аҕа дойдуну көмүскээччилэр күннэригэр аналалах тэрээһиҥҥэ “Сосновый бор” лааҕырга сылдьан туохха үөрэммиппин, туох саҥаны билбиппин кэпсээтим уонна 8-с хамаандам быһаарыытынан астаах дьааһыкпын Анна Брониславовнаҕа үтүө санаабытын тиэрдэн туран туттардым.
Алёна ТАППЫРОВА, VI кылаас, Уолба, Таатта
Хаартыскаҕа: хаҥастан уҥа –
Алена Таппырова, нуучча тылын уонна литературатын учуутала А.Б. Егорова, иитэр үлэҕэ дириэктэри солбуйааччы А.П. Боппосова, оскуола дириэктэрэ А.В. Аржаков