Лааҕырбыт үлэтэ этэҥҥэ түмүктэннэ. Мин манна бастакы этэрээккэ сылдьыбыт оҕолору кытта билсэн, доҕордоспутум. Кинилэр наһаа истиҥ, үтүө майгылаах, сырдык санаалаах оҕолор.
«Саас» форумҥа журналистика өттүттэн олус элбэҕи, интэриэһинэйи биллим, үөрэттим. Оннооҕор «журналист буоларым дуу» диэн толкуйдуур буоллум.
Өссө биһиги элбэҕи ситиһиилэннибит. Холобур, Москва куоракка журналистика эйгэтигэр үөрэнэ барар буоллум, «Азия оҕолоро» спортивнай оонньуулары сырдата пресс кииҥҥэ ыҥырылынным.
«Саас» форумҥа хамаанданан үлэни саамай сөбүлээтим. Оҕолор наставникпыт тула түмсэн, бэйэ-бэйэбитин өйдөһөн үлэлээтибит. Хамаанда оҕолоро саастарынан миигиттэн улаханнар эрээри, балтыларын курдук илдьэ сырыттылар. Вика Борисова, Света Заровняева ыстатыйа суруйарбар көмөлөспүттэрэ, сүбэлээн биэрбиттэрэ.
«Саас» форумҥа уоннуу киһилээх 8 хамаанда 5 күн устата сыралаһан кылгас видео оҥордубут. Түмүккэ биһиги хамаандабыт бастакы миэстэ буолбута. Онно хамаанда оҕотугар барыларыгар «DNS» техника маҕаһыыныттан 3-түү тыһыынчалаах серификаты туттарбыттара. «Сахапечать» тэрилтэ салайааччыта Нюргуяна Михайловна Стручкова биһиги хамаандабыт хабылык, хаамыска туһунан кылгас видеотын сөбүлээн, барыбытыгар «DNS» техника маҕаһыыныттан 5-тии тыһыынчалаах сертификаты бэлэхтээбитэ. Онон барыта холбоон, 8 тыһыынчалаах сертификаттаммытым.
Бүгүн лааҕыртан бүтээт даҕаны да, тута «DNS» техника маҕаһыыныгар айаннаатым. Уонна сертификаттарбын туттан, Алиса Яндекс мини станция атыыластым. Олус-олус үөрдүм.
Алёна ТАППЫРОВА, VI класс, Уолба, Таатта