Дьокуускай куоракка «Сосновый бор» оҕолору сынньатар уонна чэбдигирдэр киин сыллата өрөспүүбүлүкэ бары улуустарыттан үгүс оҕону түмэр, олохторугар ураты умнуллубат түгэннэри бэлэхтиир.
Быйыл биһиги “Кэскил” медиа-оскуола юнкордара “Муус устар” ыччат бэстибээлин иһинэн “Саас” форум сменатыгар кэлэммит үөрэнэ сылдьабыт. Өрөспүүбүлүкэ араас муннугуттан юнкордар “Саас” форум сүүмэрдиир түһүмэҕин ааһаммыт “Сосновый борга” түмсэн элбэххэ үөрэнэ, бэйэ-бэйэбитин кытта доҕордоһо сылдьабыт. Биһигини кытта “Бастакылар хамсааһыннарын” көхтөөх оҕолоро бааллар, бэйэлэрин билиилэриттэн бэрсэллэр, кэпсииллэр.
Халандаары көрдөхпүтүнэ, санаабыт түһэр. Тоҕо? Сменабыт түмүктэнэрэ аҕыйах күн хаалла. “Тоҕо бириэмэ түргэний, бэҕэһээ эрэ кэлбит курдук этибит” диэн өрө тыынабыт. Күн солото суох сылдьабыт. Элбэх дьону кытта көрүстүбүт, хамаанданан үлэлиибит, этэрээтинэн бииргэ сылдьабыт. Биһигини күннэтэ “Кэскил” медиа оскуола оператордара, куратордара, видеографтара үөрэтэллэр. Киһи ханнык хайысхаҕа дьоҕурдааҕын көрөн, элбэхтик үөрэнэн, сайдан иһиэхтээх.
Юнкор оҕолор 8 хамаандаҕа арахсан, хас биирдии хамаанда биэс күн устата бэриллибит тиэмэлэринэн кылгас видео ролик уһуллубут. 40, 50, 60 сөкүүндэ уһуннаах видео улахан сыраттан тахсарын үчүгэйдик биллибит.
Олунньу 16 күнүн өр өйдүү-саныы сылдьыахпыт дии саныыбын. Тоҕо? Бу күн хамаандалар видеобытын көмүскүүр күммүт этэ. Долгуйуу, тиритии-хотуу. Бу иннинэ олунньу 15 күнүгэр биһигини кытта Маргарита Лянге бэйэтинэн кэлэн көрсүбүтэ, сүбэ-ама бөҕөтүн биэрбитэ. Хамаандалар ол күн киэһэтигэр утуйар ууну умнан Маргарита Лянге биэрбит сүбэлэринэн үлэбит итэҕэстэрин көннөрбүттэрэ. Барыйыак көмүскээһин түмүгүнэн бастакы миэстэни 8 хамаанда (Вика Борисова, Света Заровняева, Коля Бандеров, Таман Поисеев, Колесов Вадим, Лазарев Айаан, Саввинов Дима, Мохначевский Юра, Исаголиева Карнелия¸ Таппырова Алена) ситистэ уонна 30 тыһынчалаах сертификаты тутта. Иккис миэстэни 1 хамаанда (Яковлева Полина, Зырянова Мичийээнэ, Прокопьев Гаврил, Наумов Наум, Амелия Пинигина, Григорьева Алина, Егоров Александр, Еремеев Савелий, Басыгысова Дарина, Павлов Дуолан) ситистэ уонна 20 тыһыынчалаах сертификаты тутта.
Үһүс миэстэни 5-с хамаанда (Готовцев Дамир, Белолюбский Антон, Атласов Роман, Вакатова Милана, Константинова Светлана, Коваленко Лидия, Михайлова Алина, Можарова Вероника, Ударин Илья, Подобашева Екатерина) ылла уонна 15 тыһыынчалаах сертификаты тутан үөрүүлэрэ муҥура суох.
Ити курдук хамаанданан үлэлээн, онтон иллэҥ кэмҥэ этэрээттэринэн араас тэрээһиҥҥэ кыттан, сэргэх күннэри атаара сылдьабыт.
Наум НАУМОВ, IX кылаас, Кустуур, Эбээн Бытантай