Мин «Сосновый бор» оҕо чэбдигирдэр киинигэр «Саас» форум сменатыгар кэлэн үлэлии, үөрэнэ сылдьабын.
«Кэскил» медиа-оскуола куратордара биһигини, юнкордары, күн аайы сатаан суруйарга, видеоны сатаан устарга, ону сөптөөхтүк монтажтыырга, санаабытын сатаан тиэрдэргэ, хамаанданан үлэлииргэ үөрэтэллэр. Биллиилээх, ситиһиилээх дьону кытта көрсүһүүлэри тэрийэллэр.
Олунньу 15 күнүгэр Маргарита Лянгены кытта көрүстүбүт. Кини блогер, ютуб ханаалыгар балтараа мөлүйүөн подписчиктаах. Россияҕа олорор норуоттар туһунан кэпсиир. Маргарита Лянге Россияҕа олорор 190-тан тахса норуот бары эйэлээхтик, этиспэккэ олороллорун туһугар кыһаллан үлэлиир эбит. Кини биһиэхэ Москва куораттан айаннаан кэлбит. Кылгас видеону хайдах устарга, тугу устарга кэпсээтэ уонна боппуруостарга эппиэттээтэ.
Маргарита видеоҕа саҥарар ведущай күүстээх эмоциялаах, туох туһунан кэпсиирин билэр буолуохтаах диэтэ. Онтон видеоҕа информацияны хантан ылаҕын диэн ыйыппыппытыгар: «Информацияны барытын төбөбүттэн ылабын. Элбэх кинигэни ааҕабын. Музейга, уулуссаҕа сылдьан интэриһинэйи барытын көрөбүн, туһанабын», – диэн эппиэттээтэ.
Бу күн медиа хамаандалар оҥорон таһаарбыт кылгас видео роликтарбытын көрдөрдүбүт, Маргарита Лянге туох тиийбэтин, туох мэһэйдэр баалларын ыйан биэрдэ.
Блогер интэриэһинэйдик кэпсиир, харизматичнай киһи эбит диэн көрдүм. Маргарита Лянгены ютубка көрдөххө уонна дьиҥнээхтии бэйэтин көрдөххө уратылаах эбит. Мин бу көрсүһүүнү сөбүлээтим уонна наар өйдүү сылдьарым буолуо.
Дмитрий САВВИНОВ, VII кылаас,
Б.Н. Егоров аатынан Күндэйэ орто оскуолата, Сунтаар