Олунньу 2 күнүгэр Ньурба улууһугар К.Д. Уткин аатынан Марха орто оскуолатыгар Бүлүү, Ньурба, Сунтаар улуустарын эдэр суруналыыстара, юнкордара күөн көрүстүлэр.
Уопсайа сүүстэн тахса кыттааччы, 22 хамаанда кыттыыны ылла. Оҕолорго Николай Егорович Мординов-Амма Аччыгыйа аатынан «Кэскил» оҕо бэчээтин кыһатын үлэһиттэрэ сценарий суруйарга, видео устан монтаажтыырга, хаһыат тас көрүҥүн оҥорорго маастар-кылаастары ыыттылар.
Тэрээһин сүрүн чааһынан «Кама Хана» продюсера Юрий Борисов социальнай ситимнэргэ ханаал оҥорон үлэлэтэр туһунан бэйэтин уопутун үллэһиннэ. Кыттааччылар олуһун сэргээтилэр, билиҥҥи кэмҥэ медиа хайысха киһи олоҕор улахан суолталааҕын өссө төгүл өйдөөтүлэр.
Салгыы кыттааччылар чаас устата бэриллибит тиэмэлэринэн сиппит-хоппут медиапродукт оҥорон көмүскээтилэр.
Ол түмүгэр форум сүүмэрдиир түһүмэҕин кыайыылаахтарынан буоллулар:
1 миэстэ — Б.Н. Егоров аатынан Күндэйэ орто оскуолатын хамаандата (Сунтаар улууһа).
2 миэстэ — И.Г. Чиряев аатынан Бүлүү куорат бастакы нүөмэрдээх оскуолатын хамаандата (Бүлүү улууһа).
3 миэстэ — Маар орто оскуолатын хамаандата (Ньурба улууһа).
Бу хамаандалар дипломнарынан уонна «Бэс чагда» оҕо сынньанар чэбдигирэр киинигэр путевканан наҕараадаланнылар.
Маны таһынан анал ааттары ыллылар:
«Бастыҥ видео» — Н.И. Прокопьев аатынан Хатыы орто оскуолата, Ньурба улууһа.
«Бырайыагы бастыҥ көмүскээһин» — Эмильян Константинов «Кэскил» оҕо сайдар киинин иитиллээччитэ, Бүлүү улууһа.
«Бырайыагы ураты көмүскээһин» — Ньурбатааҕы элбэх хайысхалаах гимназия хамаандата.
Дария Данилова (Чукаар орто оскуолата), Харысхан Андреев (Тааһаҕар орто оскуолата), Джулияна Дорофеева (Бүлүү гимназията), Камелия Яковлева (Маар орто оскуолата), Николай Степанов «Бэс чагда» оҕо сынньанар чэбдигирэр киинигэр тус ыҥырыыны туттулар.
Бу тэрээһин «Муус устар-2024» фестиваль чэрчитинэн Бүлүү бөлөх оскуолаларын сүүмэрдиир форум быһыытынан ыытылынна.
К.Д. Уткин аатынан Марха орто оскуолатын бары үлэһиттэригэр, Ньурба улууһун үөрэҕириитин салалтатыгар, Ньурба улууһун администрациятыгар улахан махталбытын биллэрэбит.
keskil14.ru