«Бэлэм буол» хаһыат урукку нүөмэрдэригэр «Походтар, булумньулар» диэн рубрика куруук бэчээттэнэр эбит. Онно оҕолор төрөөбүт дойдуларын сирин-уотун чинчийиилэрэ, ол түмүгэр тугу ситиспиттэрин туһунан кэпсииллэр.
Холобур, «Бэлэм буол» 1965 сыл бэс ыйын 17 күнүнээҕи нүөмэригэр «Эбэбит тулатын чинчийдэххэ» диэн Н. Иванов суруйуута баар. Ааптар маннык чахчыны бэлиэтээбит: «Биһиги тапталлаах Бүлүү өрүспүт 2650 км усталаах. Киниэхэ 15.664 үрэх уутун кутар».
Ити кэмнэргэ Бүлүү өрүс тардыыта балайда чинчиллэр буолбут. Бу үлэҕэ Кутана аҕыс кылаастаах оскуолатын үөрэнээччилэрэ эмиэ кытталлар эбит.
Ол үлэҕэ 7-с кылаас оҕолоро Бүлүү өрүс уҥуоргу өттүгэр тахсан суулла турар хайаны уонна кини аттыгар баар үрэҕи палеонтологическай сорудах ылан чинчийбиттэр уонна мамонт аһыытын булан киирбиттэр. Онтон 5-с кылаас үөрэнээччилэрэ Бүлүү өрүһү таҥнары 11 км сиринэн сылдьыбыттар уонна 24 араас минераллары булбуттар. 5-с кылаастар алаас уонна үрэх сир үүнээйилэрин уонна хамсыыр харамайдарын үөрэтэр сыаллаах сылдьыбыттар.
Оҕолор бу походтарга сылдьан оскуола музейыгар 12 экспонаты булан аҕалбыттар.
кэскил14.ру