Нэһилиэктэр икки ардыларыгар көрүү-бэстибээл Лөгөй нэһилиэгэр!
Илин халлаан күнүн анныттан
Күлэн-салан күндээрийэн таҕыста
Улуу кыайыы 80 сыла!
Олунньу 20 күнүттэн кулун тутар 4 күнүгэр диэри Уус Алдан улууһугар сылын ахсын ыытыллар нэһилиэктэр бэстибээллэрэ түмүктэннэ. Быйылгы бэстибээл Улуу кыайыы 80 сылыгар Арассыыйаҕа Аҕа дойдуну, Саха Өрөспүүбүлүкэтигэр Ийэ дойдуну көмүскээччилэр, Уус Алдан улууһугар Тыа хаһаайстыбатын сылларыгар анаан «Уруйдуубут Улуу Кыайыыны» нэһилиэктэр икки ардыларыгар көрүү-бэстибээлэ буолан ааста.
Ол курдук, олунньу 24 күнүгэр Лөгөй нэһиэлиэгин дьоно-сэргэтэ «Уруйдуубут Улуу Кыайыыны» улуустааҕы бэстибээлгэ биир санаанан кыттыыны ыллылар. Бэстибээл Кыайыы болуоссатын умуллубат үйэлээх уокка сүгүрүйүүттэн саҕаламмыта. Манна нэһилиэк баһылыга Николай Николаевич Попов, үлэ, спорт ветерана, Лөгөй нэһилиэгин бочуоттаах олохтооҕо Василий Румянцев аҕа дойду сэриитин кэмигэр нэһилиэк дьоно-сэргэтэ улуу кыайыыны күргүөмүнэн уһансыбыттара диэн этэн тураннар сибэкки дьөрбөтүн уурдулар.
Сылын ахсын Лөгөй нэһилиэгэ быыстапканы үрдүк таһымнаахтык туруорар. Ыалдьыттары нэһилиэк далбар хотуттара арыылаах алаадьынан, көөнньүрүллүбүт быырпаҕынан айхаллыы көрүстүлэр. Быыстапканы «Сэрии» диэн суостаах тыл ыалы барытын аймаабытын, ийэ уолун сэриигэ атаарар көстүүттэн саҕаламмыта олус долгутта. Быыстапкаҕа Лөгөй нэһэлиэгин «Ийэлэр өлбөт үйэлээх хорсун быһыылара», «Өлбөт сүппэт үйэлээх полк» диэн тиэмэлэри Сысолятин Янис, Аня Бурнашева кэпсээтилэр. Сэрии бэтэрээнэ, учуутал идэлээх Прокопий Алексеевич Самсонов туһунан саха тылын уонна литературатын учуутала Петухова Варвара Семеновна кэпсээтэ. Онтон спорт саалаҕа кыайыы тыынын киллэрэн ыалдьыттары сэрии кэминээҕи аһынан көрүстүлэр.
Салҕыы бэстибээл уус–уран көрүүтэ Бүөтүр Оҕотоойоп аатынан сынньалаҥ киинигэр бэрт таһымнаахтык, биир тыынынан ыытылынна. Кэнсиэргэ олус үҥкүү, ырыа бөлөхтөрүн сэргии көрдүм. Быйылгы кэнсиэр олус элбэх дьону хабан туруоруллубута бары биир сомоҕо буолалларын тута көрдөрөр. Махталбытын биллэрэбит бу бэстибээлгэ күүс-көмө, кыттыыны ылбыт нэһилиэкпит дьонугар-сэргэтигэр. Ол курдук, бэстибээл түмүгүнэн улахан нэһэлиэктэргэ Лөгөй нэһэлиэгин быыстапката -4,8 баалы ылан бастакы миэстэни ылары ситистэ, кэнсиэр -4,25 баалга сыаналанна. Уопсай түмүккэ Лөгөй нэһэлиэгэ 4,52 баалы ылан бочуоттаах 3 миэстэни ылары ситистэ.
Янис СЫСОЛЯТИН Лөгөй лиссиэй-интэрнээт «SiTiM LegMedia» юнкора