Үчүгэйи эрэ айарга
Владимир Ильич Ленин төрөөбүт күнүгэр пионер мэктиэ тылын биэрбиппитин кэннэ, биһиги түөспүтүгэр кыыһар кыһыл хаалтыһы баайбыттара олохпут саамай чаҕылхай, умнуллубат, долгутуулаах бэлиэ күнүнэн буолбута. “Пионер эппит тылын хайаан да толорор, кыраларга, кыамматтарга куруутун көмөлөһөр, эҥкилэ суох чиэһинэй, дьоҥҥо-сэргэҕэ үчүгэйи эрэ оҥоро сылдьар оҕо буолуохтаах”, – диэн өйдөбүл биһиги көлүөнэ дьон өйүгэр-санаатыгар кытаанахтык иҥпитэ уонна ону күн бүгүҥҥэ диэри тутуһа сылдьабыт.
Пионер элбэҕи билиэхтээх, кинигэни кытта доҕордоһуохтаах диэн, нуучча, сэбиэскэй уонна омук суруйааччыларын айымньыларын умсугуйан туран ааҕарбыт. Сэбиэскэй Сойууска бары пионердар «Пионерская правда» хаһыаты, «Пионер», «Костёр» сурунааллары, Саха сиригэр «Бэлэм буол», «Будь готов» хаһыаттары суруйтаран ааҕан, билиибитин кэҥэтэрбит.
Сэбиэскэй Сойуус пионердара буоларбытынан олус киэн туттар этибит. Күһүн субуотунньуктарга холкуос, сопхуос хортуоппуйун, турнепсын хомуйар этибит, хотон таһын, ичигэс буоллун диэн сыбыырбыт, сааһын хаарын түһэрэрбит, ыанньыксыттарга кэнсиэр көрдөрөрбүт, ынахтарын ыан сынньатарбыт, тимуровец буолан, бэтэрээннэргэ үөрэ-көтө көмөлөһөрбүт. Бу тэрээһиннэр биһигини эппиэтинэстээх, дьоҥҥо-сэргэҕэ үтүө сыһыаннаах буоларга үөрэтэллэрэ, уһуйаллара.
Мин 1986 сыллаахха Намнааҕы пионердар дьиэлэригэр «Гелиос» фотостудия салайааччытынан үлэлии киирбитим. Сүрдээх көхтөөх пионер фотокэрэспэдьиэннэрбин кытта Пионер дьиэтин, Нам оройуонун пионерскай тэрилтэтин үлэтин-хамнаһын хаартыскаҕа түһэрэн, сырдатан, «Пионерская правда», «Бэлэм буол», «Будь готов», «Ленин суола» хаһыаттарга тиһигин быспакка тахсар буолбуттара. Нам «Ленин суола» хаһыатыгар Виталий Васильевич Сыромятников «Сыдьаайа» диэн эдэр фотокэрэспэдьиэннэр хаартыскаларын бэчээттиир рубриканы арыйан, оҕолор хаартыскалара куруутун бэчээккэ тахсан, сэҥээриини ылар буолбуттара. Онтон хаартыскаһыт оҕолорум тутум үрдээбит буолуохтаахтар. Ол курдук, кинилэртэн Эдуард Гаврильев, Евгений Охлопков диэн биллиилээх режиссер дьон тахсыбыттара.
Пионерскай тэрилтэ үтүөнү эрэ оҥорор дьон буолбуппутугар олук уурбута дьиҥ чахчы. Онон мин билигин да Бүтүн Сойуустааҕы пионерскай тэрилтэбэр махталым муҥура суох.
Светлана ЕМЕЛЬЯНОВА,
РФ үөрэҕириитин бочуоттаах үлэһитэ,
РФ суруналыыстарын Сойууһун чилиэнэ,
СӨ үөрэҕириитин туйгуна.