«Сосновый бор» бу күннэргэ араас оҕолору түмтэ. Сорох оҕолор үөрэхтэригэр ортолор эрээри, АйТи эйгэтигэр үчүгэйдэр. Чуумпу, бэйэтэ бэйэтигэр сылдьар оҕо программирование сорудаҕын толорорго оскуола лидериттэн ордук буолар. Онон, дьэ, ким да билбэт, бу симиэнэ түмүгүнэн ким бастаан тахсыаҕын, ким Москваҕа аатырбыт «Сколково» инновация киинигэр Россиятааҕы Хакатоҥҥа кыттыаҕын…
“Хакатоҥҥа “Бастыҥ дизайнер” аатын ылбытым”.
Рустам Максимов, XI кылаас (Майатааҕы лиссиэй):
— Улуустааҕы Хакатоҥҥа 3 миэстэлээхпин. Онно хамаандабар программистаабытым. Илин эҥэр Хакатонугар дизайнер быһыытынан кыттан, хамаанданан бастаабыппыт уонна мин “Бастыҥ дизайнер” аатын сүкпүтүм. “Сосновый бор” лааҕыры сөбүлээтим. Манна робототехникаҕа, программированиеҕа үөрэтэллэр.
Оскуолабытыгар көмпүүтэр оонньуутун оҥорорунан дьарыктанабыт. Барыта саха тылыгар аналлааҕы оҥоробут. Уопсайа, 4 оонньууну оҥордубут.
Уонна ыллыырбын сөбүлүүбүн, урут ансаамбылга ыллыыр этим. Сүрүннээн ангылычаан тылынан ыллыыбын. Avicii диэн Швеция диджейын уонна композиторын айымньытын сөбүлүүбүн. Хомойуох иһин, кини эдэр сааһыгар өлбүтэ. Попса ырыаһыттарын истибэппин, сахалыыны да, нууччалыыны да.
“Арт-Горный” сайт оҥорон, харчынан наҕарадаламмыппыт”
Виталий Винокуров, IX кылаас (Маҥарас, Горнай):
— Мин Ай-ти хамаандаҕа дизайнербын. Улуустааҕы Хакатоҥҥа хамаанданан 1 миэстэлээхпит. 2021 сыллаахха Горнайга ыытыллар Манчаары оонньууларыгар анаан, “Арт-Горный” диэн сайт оҥорбуппут. Кыайаммыт, 8 тыһ.солк.сууманан наҕараадаламмыппыт. Сайтпыт 2020 сылтан үлэлиэхтээх. Манна Интернет-маҕаһыын нөҥүө Оонньууларга аналлаах табаардары атыылыахпыт. Оскуолабыт уруһуйдьут кыргыттара куруускаҕа, футболкаҕа, брелокка түһэриллэр ойуулары оҥоро сылдьаллар.
Туох идэлээх киһи буолуохпунуй? КАМАЗ массыынаны ыытар “дальнобойщик”! Тоҕо дуо? Киһи барыта соһуйар. Мин үөрэхпэр ортобун, онон автодорожнай техникумҥа үөрэнэ барар санаалаахпын. Улахан тиэхиньикэни сөбүлүүбүн. Тыраахтары, массыынаны, матасыыкылы ыытабын.
“JavaScript, С++, Python тылынан үлэлиибин”
Михаил Игнатьев, X кылаас (Майатааҕы лиссиэй):
— Регионнааҕы олимпиадаҕа, WorldSkills күрэххэ хамаанданан 2 миэстэ буолбуппут. Программированиеҕа JavaScript, С++, Python тылынан үлэлиибин. Вэб-сайт оҥорбутум.
Лааҕырга элбэҕи үөрэтэллэр. Мин инники идэбин программированиены кытта ситимниир санаалаах буоламмын, бу миэхэ наадалаах.
Кинигэни ааҕабын дуо? Сороҕор ааҕыах санаам кэллэҕинэ, кинигэни тохтообокко ааҕан, бүтэриэхпин сөп. Төһө да инникитин көмпүүтэргэ эрэ үлэлиир идэни талларбын, кинигэни ааҕар хаһан баҕарар наадалаах дии саныыбын.
Таисия Алексеева