Ф. Г. Охлопков аатынан Майа орто оскуолатын VIII кылааһын үөрэнээччитэ Валера Емельянов ордук гуманитарнай үөрэҕи сэргиир. Кинигэни, хаһыаты ааҕарын сөбүлүүр. АйТи эйгэтигэр да сыһыаннаах, Worldskills күрэххэ кыттар. “Охлопков-ньюс” оскуола телестудиятыгар оператор, монтажер быһыытынан үлэлиир. “Видеосьемка” куруһуок оҕолоро нэһилиэнньэҕэ хаартыскаҕа түһэрэр өҥөнү оҥороллор. Валера онно үлэлээн, бырыһыан, төлөбүр аахсар. Баҕа санаата: КВН-ҥа кыттыы.
— Элбэх оҕоттон талыллан, «Кэскил» хаһыат путевкатынан «Сосновай бор» лааҕырга кэлэн, олус элбэх саҥаны биллим, үөрэнним, үгүс саҥа доҕоттордоннум. Күн аайы саҥаттан саҥа, интэриэһинэй тэрээһиннэр, куонкурустар буолаллар.
Ордук сөбүлээбит тэрээһиним — «Дэнс баттл». Манна академиялар аныгы үҥкүүлэргэ күрэстэстилэр. Биһиги хас да күн бэлэмнэммиппит. Баттлга күүстээх киирсии буолбута: утарсар хамаандан үҥкүүлээн бүттэ да, эн хамаандан саҥаттан саҥа хамсаныылары көрдөрөн иһиэхтээх. Хомойуох иһин, биһиги финалга киирбэтэхпит. Ол эрээри үҥкүүлээн дуоһуйбуппут, бэйэ-бэйэбитин кытары өссө үчүгэйдик билсибиппит. Баттл түмүгүнэн 5-с академия бастаабыттара. Кинилэри истиҥник эҕэрдэлиибин.
АйТи дьарыгар биһиги олус интэриэһинэй бырайыагы оҥоро сылдьабыт. Бары билэрбит курдук, Саха сирэ тымныытынан аатырар. Нано технологиянан тымныыны киллэрбэт, сылааһы тутар купол оҥоруохпутун баҕарабыт. Ол матырыйаал киһи хараҕар көстүбэт буолар. Анал компьютернай бырагырааманан оҥорон, Сахабыт сирин куполынан сабан кэбиһэбит. Оччоҕо кыһыҥҥы тымныы буолбат. Экономия өттүнэн ыллахха, кыһыҥҥы таҥаска харчыны бараабаппыт, оттукка гааһы, электричествоны, маһы бараабаппыт.
Ааптар: Таисия Алексеева