Нам улууһун Нам сэлиэнньэтин «Сайдыс» улуустааҕы оҕо лааҕырын иһинэн төрөөбүт кыраайы үөрэтэр хайысхалаах «Поиск» этэрээт бэс ыйын 10 күнүттэн от ыйын 2 күнүгэр диэри үлэтин саҕалаата. Салайааччы — Надежда Ивановна Семенова. Быйыл уопсайа 100 оҕо «Юный блогер», «Поиск», «Төрүт дорҕоон», «Ай-Куо», «Бизнес Лаб» этэрээттэргэ арахсан дьарыктана, үөрэнэ сылдьар. Лааҕыр начаалынньыга — Маргарита Семеновна Герасимова, дириэктэр — Надежда Гаврильевна Дьячковская.
Манна күн аайы араас дьарыктар икки бөлөххө арахсан ыытыллаллар. Ол курдук, бэс ыйын 23 күнүгэр лааҕыр 5 этэрээтэ биирдии хамаанда туруоран «Мин дойдум — Саха сирэ» диэн викторинаҕа билиилэрин-көрүүлэрин тургутан көрдүлэр. Викторина түмүгүнэн, бастакы миэстэҕэ — «Поиск», иккис — «Юный блогер», үһүс — «Ай-Куо» этэрээт хамаандалара буоллулар, грамоталарынан уонна минньигэс бириистэринэн наҕараадаланнылар.
Инники былааннарга оҕолору араас маастар-кылаастар, краеведческай экскурсиялар күүтэллэр. «Төрөөбүт дойдум устун айан» диэн үһүс сылын ыытыллар бырайыак үлэтэ саҕаланна.
keskil14.ru