Горнай улууһуттан анал байыаннай дьайыыга элбэх дьон кыттыбыта, билигин да кытта сылдьар. Кинилэр күүстээх санааларын, Ийэ дойдуга бэриниилэрин хас биирдиибит сыаналыыр, ытыктыыр тустаах. Биһиги биир дойдулаахпытын, этэҥҥэ эргиллэн кэлбит буойуну, анал байыаннай дьайыы бэтэрээнин, Горнай улууһуттан «Муус устар» ыччат бэстибээлигэр амбассадор быһыытынан кыттыыны ылар Станислав Степановы кытары көрсөн аҕыйах ыйытыкка хоруйдууругар көрдөстүбүт.
— Үтүө күнүнэн! Баһаалыста, бэйэҥ тускунан кылгастык сырдатыаҥ дуо? Хантан төрүттээххитий, ханна үөрэммиккитий?
— Мин Горнай улууһун Бэрдьигэстээҕэр элбэх оҕолоох дьиэ кэргэҥҥэ кыра оҕонон күн сирин көрбүтүм. Аҕам Ис дьыала уорганын бэтэрээнэ, билигин бочуоттаах сынньалаҥар олорор. Ийэм нэһилиэнньэ социальнай көмүскэлин управлениетыгар үлэлиир. Эдьиийдээхпин уонна икки убайдардаахпын. 1999 сыллаахха 1-кы нүөмэрдээх оскуолаҕа үөрэнэ киирбитим.
— Оскуоланы хас сыллаахха бүтэрбиккиний? Ол кэннэ үрдүк үөрэххэ үөрэммит буоллаххытына, ол туһунан кылгастык.
— 2008 сыллаахха 9-с кылаас кэннэ Мииринэйдээҕи региональнай техническай колледжка киирэн, 2011 сыллаахха үөрэнэн бүтэрбитим. Ол кэннэ 2011 сыллаахха аармыйаҕа сулууспалыы барбытым. Биир сыл сулууспалаан кэлэн баран, 2014 сыллаахха Москватааҕы финансово-промышленнай университекка кэтэхтэн үөрэнэ киирбитим уонна 2018 сыллаахха үөрэхпин бүтэрбитим.
— Иллэҥ кэмҥэр тугунан дьарыктанаргытын сөбүлүүгүнүй?
— Иллэҥ кэммэр уһанарбын сөбүлүүбүн. Киэһэтин спортивнай заалга дьарыктанар этим, анал байыаннай дьайыыга сылдьан эчэйиини ылбытым, сотору эмтэнэ барыахтаахпын.
— Дьиҥнээх патриот диэн, эн санааҕар, кимий, кини хайдах буолуохтааҕый?
— Патриот диэн, мин санаабар, дьиэ кэргэнтэн, иитиигиттэн, төрөөбүт тылгынан саҥараргыттан саҕаланар. Төрөөбүт дойдугар бэриниилээх буолууҥ барыта дьиэ кэргэҥҥэ иитииттэн тутулуктаах.
— Билигин тугунан дьарыктана сылдьаҕыт?
— Билигин эбии кууруска үөрэнэр баҕа санаалаахпын, үлэм суох.
— Эдэр көлүөнэ ыччакка тугу баҕарыа этигиний?
— Эдэр көлүөнэ ыччакка тиэрдиэм этэ, бэйэҕит төрөөбүт тылгытынан саҥарыҥ, кэпсэтиҥ, тылгытын умнумаҥ, тылгытын умуннугут, билбэт буоллугут да сэниэхтэрэ, кимтэн, туохтан төрүттээххитин умнумаҥ диэн этиэхпин баҕарабын.
— Кэпсээҥҥит иһин махтал! Ситиһиилэри, чэгиэн доруобуйаны баҕарабыт! Ийэ дойдубут туһугар чиэстээхтик уонна бэриниилээхтик көмүскэлгэ турбуккут иһин киэн туттабыт, махтанабыт!
Кэпсэттэ Кирилл Иванов, Сэмэн Данилов аатынан Бэрдьигэстээх оскуолатын
«Сайдам» медиакиин эдкора.
keskil14.ru