Саҥа дьыл бырааһынньыктарын кэмигэр Москваҕа «Start Up-2019» диэн куонкурус буолан ааста. Онно Саха Сириттэн Чурапчы улууһун Чыаппара кыысчаана Зоя Дмитриева кытынна.
Кини бу Бүтүн Россиятааҕы күрэххэ “Хаарчаана Куо-2018” өрөспүүбүлүкэтээҕи күөн күрэскэ кыайан кыттар чиэскэ тиксибит. Зоя хотугулуу үҥкүүнү толорон, “Хореография” номинацияҕа Гран-При буолбут. Онон кини бу сайын АХШ Лос-Анджелес куоратыгар ыыталлар «World Stars» диэн норуоттар икки ардыларынааҕы олимпиадаҕа талаанын көрдөрө барар ыҥырыыны тутта.
—Зоя 4 сааһыттан үҥкүүлүүр. Билигин 8-таах уонна номнуо 60-тан тахса араас куонкуруска кытынна. Күрэхтэһэ үөрүйэх. Онон Америкаҕа да бара сатыахпыт. «Start Up-2019» тэрийээччилэрэ Зояны сэҥээрэн, «Prince & Princess of the Universe-2019» диэн талаан уонна кэрэ көстүү куонкуруһугар кытыннардылар. Онно Зоя «Little Princess of the Univers-2019», итиэннэ бастыҥ национальнай көстүүмүн иһин «Best in National Costume-2019» ааттары ылла. Бу ситиһиитэ киниэхэ «Мини-Мисс и Мини-Мистер России-2019» күрэхтэһиигэ кыттар быраабы биэрэр, — диэн кэпсиир ийэтэ Лина Дмитриева.
