Алтынньы 7 күнүгэр Дьокуускай куоракка сэбиэскэй педагог, сахалартан собус-соҕотох ССРС норуодунай учуутала, ССРС норуотун үөрэхтээһинин туйгуна, РСФСР уонна Саха АССР үтүөлээх учуутала Михаил Андреевич Алексеев пааматынньыгар, улуу учуутал сырдык аатыгар сүгүрүйэн, биир дойдулаахтара, кини сырдык аатын сүгэр Бүлүү улууһун Баппааҕайы орто оскуолатын учууталлара анаан кэлэн сибэкки дьөрбөтүн уурдулар.
Оскуола дириэктэрэ Виталий Владиславович Макаров истиҥ-иһирэх тылынан ахтан-санаан ааста. Саха омук дьолугар төрөөн-үөскээн ааспыт чулуу киһи, уһулуччулаах учуутал Михаил Андреевич Алексеев үтүө аатыгар сүгүрүйэбит, махтанабыт уонна маннык учуутал күнүн көрсө сылын аайы М. А. Алексеев пааматынньыгр тыыннаах сибэкки дьөрбөтүн ууран, үтүө аатын үйэтитэн үрдүктүк тутулуннун, ааттаннын диэн санаатын эттэ.
Ирина Николаевна Жиркова,
М.А.Алексеев аатынан Баппаҕаайы оскуолатын алын кылааһын учуутала.
Илбэҥэ, Бүлүү.