Быйыл С.М. Васильев аатынан Чернышевскай орто уопсай үөрэхтээһин оскуолатын алта үөрэнээччи ситиһиилээхтик бүтэрэн, олох киэҥ аартыгар үктэннэ. Бары талбыт курдук талааннаах, көхтөөх оҕолор.
Олортон биирдэстэрэ — нарын-намчы Сайаана Николаева. Кини үөрэх туйгуна, оскуолаҕа үөрэммит сылларыгар араас таһымнаах олимпиадаларга, научнай-практическай кэмпириэнсийэлэргэ ситиһиилээхтик кыттан, оскуолабыт аатын үгүстүк ааттаппыта. Сайаана «Пламя» байыаннай-патриотическай кулууп хамаандатын чилиэнэ, «Долун» үҥкүү ансаамбылын солиһа.
Оскуоланы бүтэрэр өрөгөйдөөх тэрээһиҥҥэ Сайаана «Надежда Вилюйской школы» бэлиэни ылан, барыбытын үөрдүбүтэ. Ону тэҥэ туйгун үөрэҕин, үгүс ситиһиитин туоһулаан, СӨ култууратын үтүөлээх үлэһитэ, СӨ суруналыыстыкаҕа судаарыстыбаннай бириэмийэтин лауреата, Россия суруналыыстарын Сойууһун чилиэнэ Н.А. Крылов анал бириэмийэтин ылар чиэскэ тиксибитэ.
Сайаанаҕа биир кэлим эксээмэннэрин ситиһиилээхтик туттаран, сөбүлүүр үөрэҕэр киирэн үөрэнэн, үлэһит үтүөтэ буоларыгар баҕарабыт.
Чэмэлиинэ Семёнова, VII кылаас үөрэнээччитэ,
Чернышевскай, Бүлүү улууһа.