Саха сиригэр вайн-видеолары устар муода буолан эрэр. Саҥа сүүрээн инстаграмы “хайа тарта”. Үгүс дьон билэр вайнердара @hitsvine уонна @freakyjokes уолаттара үксүн нууччалыы усталлар.
Оттон сахалыы вайны сайыннараары Алик НОГОВИЦЫН, Дима БАИШЕВ уонна Степан ПОРЯДИН туруннулар. “Суораттары” кытта атах тэпсэн олорон кэпсэтиэххэ, тугу дииллэрий?
Хааһы буолбатах…
Алик НОГОВИЦЫН:
– Биһигини барыбытын киинэ эйгэтэ доҕордоһуннарда диэххэ сөп. Степа “Detsat” бөлөх резиденэ, оттон биһиги Дималыын “Олох түгэннэрэ” ситком сүрүн оруолларын толорбуппут.
Инстаграм ситимигэр “suoratt” диэни аан маҥнай мин арыйбытым. Онно араас “дап смештары” (ырыаһыт дьону үтүктэри) укпутум. Оннук курдук дьээбэ-хообо видеолары угаттыыр идэлэммитим. Онтон үлэбинэн алта ыйга гастроллуу барбытым. Ол сылдьан, Степалаах Диманы кытта кэпсэтэрбитигэр туох эрэ саҥа сүүрээни толкуйдуохха диэн санаалар үөскээбиттэрэ.
“Сахалыы вайн устар эбиппит!” диэҥҥэ тохтообуппут. Бырааттарбыт – @hitsvine уолаттара нууччалыы усталлар, оттон биһиги уу сахалыы устарга санаммыппыт.
Саамай ыарахана аатын толкуйдааһына этэ. Төбөбүтүгэр көтөн түспүт ааттар олох барсыбат этилэр, омуктууттан саҕалаан, сахалыыга тиийэ бааллара. Онтон эмискэ: “Суорат” диэтэххэ хайдаҕый?” – диэбиппитин бэйэбит да билбэккэ хаалбыппыт. Хас биирдии аат сөптөөх уруһуйдаах буолуохтаах, онно Данил Поскачин диэн табаарыспыт эмбилиэмэбитин уруһуйдаан биэрбитэ. Бары киинэ артыыстара буоламмыт, дьон сэргиир. Көрөөччүбүт ахсаана номнуо 57 тыһыынча буолла. Онон хааһы буолбатахпыт, суораппытын «минньигэһиргэттилэр».
Соһутаары
Дима БАИШЕВ:
– Хас биирдии вайнер киһи бэйэтэ тус сүмэлээх, ыччат бааһынай тылынан “фишкалаах” буолуохтаах. Биһиги, толкуйдаан баран, соһутаары, Степабыт “Тойота-Аллион” массыынатын иһигэр устарга санаммыппыт.
Вайннарбыт барыта олоххо буолбут уонна буолар түгэннэр, ону кыратык көрүдьүөс соҕус гына күүркэтэн биэрэбит: “Арай харчылаахпыт буоллар”, “Арай кыыһым бырахпыт…”, о.д.а. Итинник курдук ыччат күннэтэ муҥатыйар вайннарын устабыт. Көрөөччүлэрбит сэҥээрэн көрөллөр, ол биһиги айар үлэбитигэр көмө-тирэх буолар.
Сүөгэйдэр
Степан ПОРЯДИН:
– Тус олохпутугар сүрдээх боростуой, элэккэй уолаттарбыт. Үһүөн кыыспыт суох. Мин массыынам билигин атын, бу иннинэ “Аллиоҥҥа” 10-тан тахса вайны устубут эбит буоллахпытына, билигин 2015 сыллаах “Кроун” массыынабар устабыт.
Дьон: “Сайыҥҥы лааҕыр оҥоруоххутун сөп дуо?” – диэн ыйытар. Билигин араас бырайыактарга кытта сылдьабыт, лааҕыр туһунан тугу да этэр кыахпыт суох.
Оҕолоор, вайн устар олус уустук. Билигин “YouTube” диэн ханаалга туох барыта баар. Онно вайны хайдах усталларын көрөн үөрэниҥ ээ, оччоҕо эһиэхэ эмиэ табыллыа.
Биир үтүө күн утуйан турбуппут, доҕотторбут “Сүөгэйдэр” диэн эмиэ инстаграмҥа аккаунт арыйбыттар. Кинилэри кытары сыһыаммыт үчүгэй. Киинэ эйгэтэ биһигини сомоҕолоотоҕо дии. Кинилэр эмиэ туһунан сүмэлээх дьоннор буоллахтара.
Иннокентий ВЛАДИМИРОВ.