Маркус Пиетаринен диэн уол туһунан истибиккит? Кини иккис аата Боһуут диэн. Оттон балта – Катарина-Сахаайа. Тоҕо бу оҕолор сахалыы ааттаахтарын билэҕит дуо? Тоҕо диэтэххэ, ийэлэрэ – саха.
Боһууттаах Ньурбаттан төрүттээхтэр эбит. Ийэлэрэ Яна Пиетаринен (Николаева), Дьокуускай 23 №-дээх оскуолатын, онтон СГУ ФЭИ-тын кыһыл дипломнаах бүтэрбит. Ол кэнниттэн АХШ Огайо штатын Уиттенберг, Хельсинки университеттарын иһинэн норуоттар икки ардыларынааҕы экономика үрдүкү оскуолатыгар магистратураҕа уонна докторантураҕа ситиһиилээхтик үөрэммит. Онно үөрэнэ сылдьан, кини кэргэнин кытта көрсүбүт.
Уол туһунан кэпсээтэххэ, Маркус кыра эрдэҕиттэн спорка тардыһыылаах оҕо. Кини баҕа санаата бассейҥҥа үс миэтэрэ үрдүктэн ууга кыраһыабайдык ыстаныы эбит. Онтон сылтаан батукка ыстаныы бөлөҕөр суруйтарбыт.
Билигин кини Финляндияҕа 12 саастаах уолаттарга спортивнай гимнастикаҕа чөмпүйүөн, биирдиилээн көрүҥнэргэ күрэхтэһиигэ кольцоҕа Хотугу Европа дойдуларын 2018 с. чөмпүйүөнэ, алта көрүҥнээх күрэхтэһиигэ уонна ураҕаска тирэнэн ойууга – боруонса призера буолар. Боһууту Ирактан сылдьар киһи гимнастиканан нэдиэлэҕэ 20 чаас дьарыктыыр.
Оттон балта, Катарина-Сахаайа, 6 сааһыттан Хельсинки куоракка гимнастика кулуубугар сылдьар. Былырыын кини үрүҥ көмүс мэтээллэммит. Кыыс эмиэ убайыныын тэҥҥэ сүүрбэлии чаас дьарыктанар.
Бу ситиһиилэрэ ыарахан үлэттэн, туруоруллубут соругу толорууттан уонна чугас дьоннорун өйөбүллэриттэн тахсар. Кыыс оскуолаҕа бэриллэр дьиэтээҕи үлэтин дьарыктана айаннаан иһэн оптуобуска эбэтэр спорт саалатын сыгынньахтанар сиригэр оҥорор. Оннук гынан, кини киэһэ иллэҥ буолар. Ол кэмҥэ кинигэ ааҕарын, сөтүөлүүрүн уонна уруһуйдуурун сөбүлүүр.
Сахаайа улахан баҕа санаата – Финляндия сүүмэрдэммит хамаандатын сүрүн бөлөҕөр киирии. Ол уһун дьаныар, итиниэхэ тулуур уонна күүс наада.
Ийэлэрэ Яна, төһө да ыраах буоллар, оҕолорун сахалыы ааттаабыта кэрэхсэбиллээх.
Дьэ, билигин эһиги биллигит – ыраах Финляндия дойдутугар биһиги биир дойдулаахтарбыт саха аатын кэрэхсэтэ сылдьалларын. Аны кинилэри болҕойон кэтээн, хас биирдии кыайыыларыгар үөрүөхпүт.
Ааптар: Айаана Третьякова.