Бороҕоҥҥо «Өркөн Skills» оҕо дьоҕурун сайыннарар лааҕыр бэркэ тэриллэн үлэлээтэ. Манна үс хамаанданан сырыттыбыт. Бу лааҕырга араас саастаах оҕолор мустаммыт күнү быһа дьарыктанан, күммүт биллибэккэ ааста. Ааспыт нэдиэлэҕэ лааҕырбыт сабыллыыта буолбута.
Мин быйыл «Өркөн» оҕону сайыннарар киин лааҕырыгар сырыттым. Биһиги этэрээппит аата «Эверест», тоҕо диэтэр үрдүккэ дабайыахпытын, элбэҕи билиэхпитин баҕарабыт. Саамай сөбүлээбитим диэн пааркаҕа «Фестиваль красок» буолбута. Манна күрэхтэспиппит, мыыла хабахтары көтүппүппүт уонна араас дьүһүннээх кыраасканан ыһыспыппыт. Ол иһин эргэ таҥас илдьэ баран кэппиппит.
Биһигини Евгения Климентьевна ону-маны оҥорорго үөрэппитэ. Оннооҕор сыттаах мыыла оҥорбуппут. Эдэр баһаатайдарбыт үҥкүүлүүргэ, бииргэ ыллыырга дьарыктаабыттара. Онтон Галина Петровна уолаттары КВН албастарыгар үөрэппитэ. Мин тастыҥ убайым Сивцев Арсен хамаанда хапытаана этэ. Кини куоракка «Радуга» лааҕырга сылдьар буолан, эрдэ барбыта.
Лааҕырбыт аһа наһаа минньигэс буолааччы. Ол иннинэ быраһаайдаһар уот уматан, ол тула олорон, лааҕырбыт үчүгэй кэмнэрин санаабыппыт. Уоппутун гирлянданан оҥорбуппут. Интернет куоластааһынынан «Мисс и мистер лагеря» талбыппыт. Онно мин уонна Жирков Иван кыайаммыт, корона кэппитим уонна үрүҥ көмүс курдук браслет ылан үөрбутум аҕай.
Лааҕырбыт бүтүүтүгэр учууталларбыт кыһын сөбүлээбит уһуйааннаргытыгар дьарыктана кэлээрин диэн ыҥырбыттара. Мин уруһуйга уонна КВН-ҥа сылдьыахпын баҕарабын.
Бу мин «Кэскилгэ» бастакы суруйуум буолар. Эбээм Анна Петровна күн аайы дневниккэ тугу интириэһиргээбиккин суруйан ис диэн сүбэлээбитэ. Ол иһин суруйарга чэпчэки эбит. Лааҕырга сылдьыбыппын умнуом суоҕа уонна аны сайын эмиэ сылдьыаҕым.
Ааптар: Платонова Милена, Мүрү №1 оскуолатын үөрэнээччитэ.
Уус-Алдан, Бороҕон.