Биhиги оскуолабытын сүүрбэ алтыа буолан бүтэрэбит. Бэһис кылаастан арыаллаан илдьэ сылдьар кылааспыт салайааччыта – Харитонова Парасковья Афанасьевна. Кини олус эйэҕэс, ирдэбиллээх, биһиги туспутугар олус кыһаллар. Учууталбыт үтүө сүбэтинэн ѳрүү кыайыыга дьулуhабыт.
Биhиги таһаарыылаахтык үлэлиир, олоҕу кытта тэҥҥэ хардыылыыр оскуолаҕа үөрэнэн, олус сайынныбыт. Биэс туйгун үөрэнээччилээхпит, уон түөрт оҕо «4» уонна «5» сыанаҕа үөрэнэр. Оскуола чаҕылхай лидэрдэрэ — биһиги кылааспытыгар оҕолоро: Холмогоров Денис – улуустааҕы «Мэҥэ кэскилэ» оҕо тэрилтэтин салайааччыта, Игнатьева Дайаана –«Ларионовцы» оҕо тэрилтэтин лидерэ (2018-19).
Кылааспыт оҕолоро Россия таһымнаах күрэхтэһиилэргэ өрөспүүбүлүкэ аатын үрдүк таһымнаахтык көмүскүүллэр. Игнатьева Даяна — «Молодой предприниматель России–2018» күрэх кыайыылааҕа. Баишев Роберт уонна Гоголев Андрей Бүтүн Россиятааҕы 3D моделирование олимпиадатыгар бастакы миэстэ буолбуттара. Бүтүн Россиятааҕы «ЮННАТ» күрэххэ Герасимова Лида кыайыылаах үрдүк аатын ылбыта, оттон биһиги Баишев Робертыын финалист буолбуппут. Челябинскай куоракка ыытыллыбыт норуоттар икки ардыларынааҕы дипломатическай оонньууга Баишев Роберт, Егоров Антон, Гаврильев Игорь, Соломонов Айтал, Баягантаева Тоня, Игнатьева Дайаана, Сидорова Лена финалга киирэн, 4-с миэстэ буолбуттара. 2018 с. ыытыллыбыт норуоттар икки ардыларынааҕы интеллектуальнай оонньууга Гоголев Андрей, Скрябин Вася, Баягантаева Тоня, Герасимова Лида, Игнатьева Дайаана, Тастигина Тоня кыттыбыттара. World Skills күрэхтэhии араас компетенцияларыгар кылааспытыттан 13 оҕо улууспут, өрөспүүбүлүкэ чиэhин кѳмүскээбиттэрэ.
Спортан эмиэ туора турбаппыт. Мичил Илларионов, Вася Скрябин, Дьулусхан Тихонов, Варьяна Шеломова – улууспут, оскуолабыт бастыҥ спортсменнара.
Григорьев Денис – Бүтүн Россиятааҕы «Байыаннай-спортивнай кыайыы» оонньуу, Черкашин Саша, Тихонов Дьулусхан, Цыпандин Вадим Белорусияҕа ыытыллыбыт патриотическай десант кыттыылаахтара.
Алын кылаастан «Тускул» ансаамбылга ыллыыбыт. Раиса Александровна Скрябина уонна Светлана Аркадьевна Борисова биһигини ырыа кэрэ эйгэтигэр уһуйбут күндү учууталларбыт буолаллар. Ансаамбылынан норуоттар икки ардыларынааҕы куоҥкурустарга кыттан, Кытайы, Турцияны, Европа куораттарын, Францияны көрдүбүт, киэҥ түһүлгэҕэ ыллаатыбыт. Санкт-Петербург куоракка ыытыллыбыт «Салют талантов» бэстибээлгэ кыттан, лауреат буолбуппут. Атын дойдуга сылдьан, улахан куонкурустарга кыттан олус сайынныбыт, атын норуоттар култуураларын кытта билистибит.
Орто кылаастарга сылдьан, кылааспыт салайааччытыныын «Малая академия наук» үөрэнэн кэлэрбит.
Төһө да ыраах сирдэргэ, араас лааҕырдарга сырыттарбыт, саамай сөбүлүүр сынньанар сирбит – оскуолабыт «Юность» лааҕыра буолар. Хас биирдии үѳрэнээччи оскуолабыт Хаптаҕайга, Дойдуга баар лааҕырдарыгар сылдьыахтаах дии саныыбыт. Оччоҕо эрэ киһи оскуола дьоллоох кэмнэрин толору билэр. Айылҕаҕа кылааһынан оонньуур-көрүлүүр, үөрэр-көтөр, учууталгын кытта доҕордоһортон үчүгэй туох да суоҕа буолуо… Оскуолабыт лааҕырдара – оҕо сааспыт дьоллоох уйата. Чугас ѳрүскэ, күѳлгэ сѳтүѳлээн, оскуолабыт иитэр кыылларын кѳрѳн-истэн, умнуллубаттык сайылыырбыт.
Сыллата кылааһынан араас бырайыактары олоххо киллэрэрбит – ырыа килииптэрин устуу, айар үлэбит хомуурунньугун таһаарыы, араас айан…
Иккис ийэбит кэриэтэ күндүтүк саныыр учууталбытыгар Парасковья Афанасьевнаҕа, араас бэридимиэттэри үөрэппит бары учууталларбытыгар, оскуола салалтатыгар уонна бары үлэһиттэригэр улахан махталбытын тиэрдэбит. Биһиги оскуолабытын өрүү ахта-саныы сылдьыахпыт. Оскуолабыт аатын хаһан да түһэн биэриэхпит суоҕа диэн эрэннэрэбит!
Ааптар:Лена Сидорова
В.П.Ларионов аатынан Майа орто оскуолата.