Саха Өрөспүүбүлүкэтин Бырабыыталыстыбата 2024 сыллааҕы үлэтин отчуота биһиги нэһилиэкпитигэр олунньу 10 күнүгэр буолан ааста.
Сыллааҕы үлэ отчуотугар нэһилиэкпит олохтоохторо үгүс ыйытыылары биэрдилэр.
Онтон тыын боппуруоһунан саҥа оскуола тутуута уонна суолбут оҥоһуллуутун туһунан буолла.
Оскуолабыт «Ил Ситим» оҕо тэрилтэтин активист оҕолоро «Ыра санаа оскуолата» диэн ис хоһоонноох плакат уруһуйдаан, саҥа оскуола тутуутун өрөспүүбүлүкэ, улуус салалтатыгар туруорустубут, тыл эттибит. Биһиги билигин төһө да уустук усулуобуйаҕа үөрэнэ сырыттарбыт түмсүүлээхпит, эйэлээхпит, үөрэххэ, араас куонкурустарга, күрэхтэһиилэргэ, НПК-ларга, олимпиадаларга ситиһиилэрдээхпит. Усулуобуйабыт тупсара, саҥа оскуола тутуллара буоллар ситиһиибит өссө элбиэ этэ. Мин итинник ис хоһоонноох тыл эттим.
Кырдьык даҕаны, биһиги саҥа оскуоланы наһаа баҕарабыт. Аны икки сылынан В.И. Ленин аатын сүгэр Уолбабыт орто оскуолата 120 сылын бэлиэтэ. Бу улахан үбүлүөйү саҥа, улахан, сырдык оскуолаҕа көрсүөхпүт диэн эрэнэбит.
Өрөспүүбүлүкэ салалтатын отчуотугар бастакыбын сылдьар буоламмын олус сэҥээрдим. Нэһилиэкпит олохтоохторо даҕаны, отчуот кэлэрин сөбүлүүллэр эбит, наадалаах, туһалаах дииллэр.
Алёна ТАППЫРОВА, VII кылаас,
В.И. Ленин аатынан Уолба орто оскуолата, Таатта