Ньурба улууһугар Саха Өрөспүүбүлүкэтин былааһын ситэриилээх уорганнарын 2024 сыллааҕы отчуота түмүктэннэ. Номнуо отчуокка барыта 1226 киһи кыттыыны ылбыта биллэр, онтон тус көрсүһүүгэ 90-тан тахса киһи суруттарбыт. Олунньу 20 күнүгэр Ньурба куоратыгар ыытыллыбыт мунньахха 260-ча киһи кыттыыны ылла. Отчуоту бөлөх салайааччыта СӨ Бырабыытылыстыбатын бэрэссэдээтэлин солбуйааччыта Георгий Степанов салайан ыытта.
Отчуот Ньурба куорат тэбэр киинигэр «Кыталык» култуура киинигэр буолан ааста. Үөрүүлээх быһыыга-майгыга олохтоохтор Кыайыы Знамянатын көрүстүлэр. Маны таһынан куорат олохтоохторугар, үлэ, тыыл бэтэрээннэригэр Улуу Кыайыы 80 сылынан үбүлүөйдээх мэтээл туттарылынна.
Бырабыыталыстыба бөлөҕүн чилиэттэрэ тыа сирин олохтоохторун үгүс тыын боппуруостарыгар хоруйдаатылар. Ол курдук, сүрүн боппуруостарынан Ньурба улууһугар күөх төлөн киириитэ. Нэһилиэнньэни гааска холбооһун бу Ньурба олохтоохторун уруккуттан долгутар тыын боппуруос.
Маны таһынан хаарбах дьиэлэртэн көһөрүү бырагырааматын олохтоохтор эмиэ туоһуластылар. Аны аныгы үйэ ирдэбилинэн Интернет боппуруоһа, ол эбэтэр кини үрдүк тарыыба олохтоохтору эмиэ таарыйда. Аны хаһаайына суох ыттары харайааһын туһунан биирдиилээн дьон эмиэ ыйыталыстылар. Манна СӨ Бырабыыталыстыбатын бөлөҕүттэн тустаах дьон киирбит ыйытыыларга хоруйдаатылар уонна быһаарыы биэрдилэр.
Көрсүһүү түмүгүнэн олохтоохтор Саха Өрөспүүбүлүкэтин былааһын ситэриилээх уорганнарын 2024 сыллааҕы отчуотун биһирээбиттэрин биллэрдилэр.
Биһиги, юнкордар, Ил Түмэн Ыччат, физическэй култуура уонна успуорт дьыалаларыгар сис кэмитиэтин бэрэссэдээтэлин Георгий Русланович Балакшины кытары кэпсэттибит. Ону сиһилии видеоҕа көрүҥ.
Тэрээһини сырдаттылар Алена Саввинова, Сардаана Кириллина, Арина Копылова, Виолетта Васильева Виолетта, Ньурбатааҕы техническэй лицей 7 «а» кылааһын үөрэнээччилэрэ, «Объектив» медиакиин юнкордара.
keskil14.ru