I Хомустаахха оҕолорго аналлаах бизнес-оонньуу ыытылынна. Ыытааччы – Семен Посельскай, “Эргиэн” бизнес-сообщество төрүттээччитэ, үөрэхтээһин бырайыактарын продюсера. Балаһыанньа быһыытынан икки чаас иһигэр оҕолор сорудах толоруохтаахтар. Кыайыылаахтар лааҕырга путевканан наҕараадаланныллар.
Суол устун Нам улууһун I Хомустааҕар айаннаан иһэбит… Тула көрдөххө – айылҕабыт саһарбыт, көмүс күһүн номнуо кэлбит. Алын кылаастар үөрэхтэрэ бүтэн, үөрэ-көтө дьиэлээн иһэллэр. Оскуола сып-сылаас, саҥа буспут бэрэски сытынан көрүстэ. Оҕолор ааһан иһэн хайаан да дорооболоһоллор, сахалыы кэпсэтэллэр. Онтон киһи эрэ үөрэр, сүргэтэ көтөҕүллэр.
Бизнес диэн… ыарахан
Георгий Соловьев, VII “A” кылаас, I Хомустаах оскуолата:
– Мин “Бизнес-инкубатор оскуолатыгар” сылдьабын. Онно учууталбыт Лариса Ивановна Солдатова миигин ыҥырбыта. Бу оонньууга аан бастаан кытынным. Манна хамаандам талан, дириэктэр буоллум. Маҥнайгы түһүмэх ыарахан соҕус этэ. “Бичик” кинигэ кыһатыгар туох тиийбэтин быһааран, саҥа этиини киллэриэхтээх этибит. Бизнес диэн ыарахан дьыала эбит. Оттон мин улааттахпына экэнэмиис буолуом, тоҕо диэтэххэ, ахсаан уруогун ордоробун.
Ганя Терентьев кинилиин биир кылааска үөрэнэр. Маркетолог буолбут.
– Суруйар ыарахан… Толкуйдуур да чэпчэки буолбатах. Бизнес арыйарга бааннартан иэс ылыахха наада, аны ону төлөөбөтөххө – иэдээн. Ол иһин урбаанньыт буолуохпун баҕарбат эбиппин. Сөбүлүүр уруоктарым – технология уонна биология. Юрист үөрэҕэр киирбит киһи.
Туһалаах, интэриэһинэй
Аида Алексеева, IX “A” кылаас, Хатыҥ Арыы орто оскуолата:
– Хамаандабыт түмсүүлээх, үчүгэй идиэйэлээх. Миэхэ оонньуу олус интэриэһинэй этэ. Киһи умсугуйар эбит. Бизнескэ ангылычаан тыла олус наадалаах дии саныыбын, общество уруоктара эмиэ. Бэйэм урбаанньыт буолуохпун баҕарабын. Атыы-эргиэн миэхэ быдан чугас курдук.
Наташа Заболоцкая, VIII кылаас, Саха-француз лиссиэйигэр үөрэнэр. Кини хамаандата “Комикстар – улааппыт оҕолор ааҕыыларыгар ордук формат” диэн тиэмэлээх. Бэйэлэрэ тугу сэргииллэринэн тиэмэ булан оҥорбуттара олус интэриэһинэй буолла.
– Бу оонньууга бэйэм баҕаран туран кэлбитим. Бу тэрээһиҥҥэ аан бастаан кытынным. Сыанаҕа тахсарбар, бэйэм санаабын этинэрбэр олус туһалаах. Ол гынан баран, бизнес өттүнэн барбакка, быраас үөрэҕэр туттарсарым буолуо.
Бу эйгэ миэхэ чугас
Настя Избекова, XI кылаас, Хомустаах оскуолата:
– Мин атыыга чугас киһибин. Төрөппүттэрим ИП-лаахтар, моркуоп олордон атыылыыбыт. Онно наар көмөлөһөбүн. Атыыһыт дьоҥҥо үчүгэйдик сыһыаннаһыахтаах. Бу оонньууга көхтөөхтүк кытта сатаатым. Саамай ыарахана – идиэйэ толкуйдааһына, бириэмэбит онно барда. Бу эйгэ миэхэ кыра эрдэхпиттэн чугас буолан, баҕар, бизнескэ холонон да көрүөм. Оскуолабын бүтэрэр сылым кэллэ. Эксээмэннэрбин этэҥҥэ туттаран, ФТИ-га киириэм.
Долгуйар эбиппин…
Коля Михайлов, X “A” кылаас, Нам орто оскуолата. Маннык оонньууга бастакы кыттыыта.
– Ыарахана диэн кэллиэгэлэрбин талыы. Кыргыттар сахалыы, нууччалыы үчүгэйдик саҥарыахтаахтар, информацияны чочуйан оҥоруохтаахтар. Оттон уолаттар миигин өйүөхтээхтэр. Бизнескэ киирэр ыарахан да эбит. Эппинэн-хааммынан билбит курдукпун. Улахан эппиэтинэстээх. Элбэх саҥаны биллим-көрдүм. Сыанаҕа тахсарбар долгуйар эбиппин. Бу оонньуу инникитэ кэскиллээх дии саныыбын. Биһигини оскуолабытыттан бизнескэ чугаһаталлара олус үчүгэй, туһалаах буолуо диэн эрэнэбин.
Түргэнник толкуйдуурга үөрэннибит
Саина Тихонова, X “Б” кылаас, Нам 2 №-дээх орто оскуолата:
– Бизнес өттүнэн сайдаары, баҕаран туран кэллим. Түргэнник толкуйдуурга, эппиэтинэскэ үөрэннибит. Хамаандам олус түмсүүлээх. Миигин дириэктэринэн талбыттара эрээри, бары тэҥҥэ үлэлээтибит. Бириэмэбитигэр баттастыбыт. Наһаа наадалаах тэрээһин ааста. Ол гынан баран урбаанньыт буолуохпун баҕарбаппын, кутталлаах соҕус…
Тэрээһин туһунан сиһилии өссө таһаарыахпыт.
Ааптар: Айаана Третьякова